काठमाडौं -रञ्जन विष्टको ह्याट्रिकसँगै एफिएफले मनकामना केबलकार पोखरा कपमा विजयी सुरुआत गरेको छ । पोखरा रंगशालामा मंगलबारको उद्घाटन खेलमा एपिएफले सिमराको नवजागृति युवा क्लबलाई ४० ले हराएको थियो । अब एपिएफले वैशाख ४ गते क्वार्टरफाइनलमा अर्को विभागिय टोली नेपाल पुलिस क्लबको सामना गर्नेछ ।
केही महत्वपूर्ण खेलाडी विना उत्रेको एपिएफका लागि रञ्जनले चौथो मिनेटमा पहिलो गोल गरेका थिए । १७ औं मिनेटमा अर्को गोल गरेका रञ्जनले ४८ औं मिनेटमा ह्याट्रिक पुरा गरेका थिए । एकपक्षिय खेलको ४३ औं मिनेटमा एफिएफका लागि नवीन लामाले गोल गरेका थिए । प्रतियोगितामा बुधबार रमपम झापा र रुपन्देही ११ बीच प्रतिस्पर्धा हुनेछ ।
पोखरा कपको विजेताले पाउने रकममा यसपटक डेढलाख भन्दा बढी थपिने आयोजक संघले जानकारी दिएको छ । यसअघि ३ लाख ५५ हजारको प्रथम पुरस्कार थियो भने यसपटक ५ लाख ५ हजार ५ सय ५५ रुपैयाँ पाउनेछन् । त्यस्तै दोस्रो हुने टोलीले २ लाखा ५५ हजार ५ सय ५५ पाउनेछ । यसअघि उपविजेताले २ लाख १ हजार पाउदै आएको थियो ।
पोखरा रंगशालामा वैशाख ११ गते सम्म चल्ने प्रतियोगितामा १ विदेशीसहित १२ टोलीको सहभागिता रहने संघले जनाएको छ । प्रतियोगितामा ए डिभिजन क्लब रुस्लान थ्री स्टार, लक्ष्मी हुन्डाई मनाड् मस्र्याड्दी, त्रिभुवन आर्मी, नेपाल पुलिस र एपिएफले प्रतिस्पर्धा गर्नेछन् । त्यस्तै पूर्वाञ्चल, पश्चिमाञ्चल, झापा, धरान, रुपन्देही, सिमरा र आयोजक कास्कीको पोखराले पनि प्रतियोगिता भाग लिएको छ । एकमात्र विदेशी टोलीका रुपमा भारतको नयाँ दिल्लीको युनाइटेड क्लबको सहभागिता रहेको छ ।
