काठमाडौं (हाम्रो खेलकुद) – पल्सर सहिद स्मारक ए डिभिजन लिग च्याम्पियन सिग्नेचर मनाङ मस्र्याङ्दी क्लब र फ्रेन्ड्स क्लबबीचको पहिलो हाफ गोलरहित बराबरीमा टुंगिएको छ ।
लिग च्याम्पियन बन्ने पहिलो लक्ष्य पुरा गरिसकेको छ मनाङको लिगको अन्तिम दिनमा आइपुग्दा अर्को लक्ष्य भनेको अपराजित रहनु हुनेछ ।
सातदोबाटोस्थित एन्फा कम्प्लेक्समा जारी खेलमा फ्रेन्ड्स क्लबलाई बराबरीमा रोके मनाङले अपराजित रहँदै लिग च्याम्पियन बन्ने नेपाल पुलिस क्लबको यसअघिको कीर्तिमानीसँग बराबरी गर्नेछ ।
यदि फ्रेन्ड्सलाई हराउन सकेमा भने मनाङले अर्को इतिहास रच्ने छ , लिगका सबै खेल जितेर उपाधि उचाल्ने । इतिहास रच्नका लागि मनाङसँग अब ४५ मिनेट बाँकी रहेको छ ।
यसका सबै १२ खेल मनाङले जितिसकेको छ । लिगको ६ दशक भन्दा लामो इतिहासमा मनाङ सर्वाधिक सफल टोली हो । टोलीको यो आठौं लिग उपाधि हो ।
घरेलु लिगमा आठ पटक लिग जित्ने मनाङ एक्लो टोली हो । अहिले बी डिभिजनमा रहेको आरसिटीले ६ पटक तथा रुस्लान थ्री स्टार क्लब र न्यूरोड टिम एनआरटीले समान ४ पटक लिग उपाधि जितेका छन् ।
मनाङले यसअघि २०४३, २०४४, २०४६, २०५७, २०६०, २०६२ र २०७० मा ए डिभिजन लिग जितेको थियो ।
