दिपक बोहोरा
पाँचथर– झापा ११ फुटबल क्लबले दसौं रुस्लान फाल्गुनन्द गोल्ड कप फुटबल प्रतियोगिताको उपाधि जितेको छ । झापाले ए डिभिजन टोली त्रिभुवन आर्मी क्लबलाई २–१ ले हराउँदै वर्षको पहिलो उपाधि जितेको हो ।
पहिलो र दोस्रो हाफमा पुजन उपरकोटीले गोल गरेपछि झापाको जित निश्चित भएको थियो । १–१ को बराबरी रहेको खेलको ७ मिनेट बाँकी रहँदा पुजनले निर्णायक गोल गरेका थिए । फिदिम माविको मैदानमा भएको खेलमा पुजनकै गोलबाट झापाले २३ औं मिनेटमा अग्रता लिएको थियो ।
तर, ७१ औं मिनेटमा राजिव गुरुङले गोल गर्दै आर्मीलाई खेलमा फर्काएका थिए । तर, अन्त्यमा फेरि पुजन नायक बने र झापा च्याम्पियन बन्न सफल भयो । विजेता झापाले उपाधिसहित ४ लाख र आर्मीले २ लाख रुपैयाँ प्राप्त गर्नेछ ।
