काठमाडौं (हाम्रो खेलकुद) – जापानको टोकियोमा शुक्रबारदेखि सुरु नवौं विश्व सितोरियो कराते च्याम्पियनसिपमा नेपालका डिगम्बरप्रसाद पन्त पदक पक्का गरेका गरेका छन् ।
पुरुष ८४ केजीमाथि डिगम्बरले भेनेजुएलाका खेलाडीलाई ८–० तथा मेक्सिकोका खेलाडीलाई १–० ले पराजित गर्दै फाइनलमा प्रवेश गरेपछि कम्तीमा पनि रजत पदक पक्का भएको प्रशिक्षक कुशल श्रेष्ठले हाम्रो खेलकुदलाई जानकारी गराए । फाइनलमा उनले काजाकिस्तानका खेलाडीसंग प्रतिस्पर्धा गर्नेछन् ।
यस्तै ६० केजी मुनि तौल समूहमा विजय श्रेष्ठ पदक नजिक पुगेका छन् । उनले प्रिक्वार्टरफाइनलमा चीनका खेलाडीमाथि ४–२ को जित निकालेका थिए । यस्तै क्वार्टफाइनलमा हङकङका खेलाडीसँग २–२ को अंक बराबरी भएपनि विजय सेन्सु विजेता बनेर सेमिफाइनलमा पुगेका थिए ।
विजय सेमिफाइनलमा काजकिस्तानका खेलाडीसँग ४–० ले पराजित भए । अब उनले तेस्रो स्थानका लागि आइभरी कोस्टका खेलाडीसँग आइतबार प्रतिस्पर्धा गर्नेछन् । जित हात पारे उनले कास्य पदक जित्नेछन् ।
प्रतियोगितामा नेपालबाट जम्मा ५ खेलाडीले सहभागिता जनाएकोमा पुरुष एकल कातामा पर्शुराम बाँस्तोला र गणेश थिङ तथा पुरुष ६७ केजीमा अनिश लामाको चुनौती समाप्त भइसकेको छ ।
प्रतियोगितामा गत नोभेम्बरमा इन्डोनेसियामा भएको एसियाली प्यासिफिक सितोरियो कराते च्याम्पियनसिपमा पदक जित्न सफल खेलाडीलाई सहभागी गराइएको प्रशिक्षक श्रेष्ठले जानकारी गराए ।
सितोरियो कराते संघका अध्यक्ष दावा गुरुङ हेड अफ डेलिग्रेड्सको रुपमा छन् । जापानमा भइरहेको प्रतियोगितामा सहभागी नेपाली खेलाडीलाई एनआरएनए ग्लोबल र जापान च्याप्टरले सहयोग गरेका छन् । प्रतियोगितामा ३९ देशका करिब १२ हजार खेलाडीले भाग लिएका छन् ।
