काठमाडौं (हाम्रो खेलकुद)– किर्गिस्तानमा बिहीबार सम्पन्न नादेझ्दा कपमा दोस्रो भएको नेपाली महिला फुटबल टोली शुक्रबार स्वदेश आइपुगेको छ । त्रिभुवन अन्तर्राष्ट्रिय विमानस्थलमा राष्ट्रिय खेलकुद परिषद् (राखेप) का सदस्य सचिव रमेशकुमार सिलवाल, अखिल नेपाल फुटबल संघ (एन्फा) का अध्यक्ष कर्मा छिरिङ शेर्पालगायत पदाधिकारीले स्वागत गरेका थिए ।

 

बिहीबार भएको फाइनलमा उज्वेकिस्तानसँग ३–२ ले पराजित हुँदै नेपालले उप विजेतामा चित्त बुझाउनु परेको थियो । ४ राष्ट्रको सहभागिता रहेको च्याम्पियनसिपमा नेपालले उज्वेकिस्तानलाई मात्र हराउन सकेन । आयोजक किर्गिस्तानलाई ८–२ ले हराउँदै दमदार सुरुवात गरेको नेपाल अर्को खेलमा उज्वेकिस्तानसँग २–० ले पराजित भएको थियो ।

राउन्ड रोविनको तेस्रो खेलमा ताजकिस्तानलाई १ –० ले हराउँदै फाइनलमा स्थान बनाएको नेपाल फाइनलमा पुनः उज्वेकिस्तानसँग पराजित भएको थियो । नेपाल उपविजेतामा सिमित भएपनि टोलीकी फरवार्ड सावित्रा भण्डारी सम्बा प्रतियोगितामा निकै चम्किइन् । खेलेका ४ मध्ये ३ खेलमा ७ गोल गरेकी साम्बा च्याम्पियनसिपकी उच्च गोलकर्ता बनिन् ।

सोही प्रतियोगिताका दौरानले उनले नेपालका लागि सर्वाधिक ३५ गोल गर्ने महिला खेलाडी अनु लामासँग बराबरी गरेकी छिन् । स्वदेशमा मंसिरमा आयोजना हुने १३ दक्षिण एसियाली खेलकुद (साग) को तयारीका सिलसिलामा महिला टोली किर्गिस्तान गएको थियो । एन्फाले फेरि आफ्नो पुरानै रवैयालाई निरन्तरता दिने क्रममा टोली फर्कने सञ्चारमाध्यमलाई जानकारी दिएन ।