काठमाडौं (हाम्रो खेलकुद) – स्वीट्जरल्यान्डका अन्तराष्ट्रिय प्रशिक्षक पाभेल रिहोरेकले आसन्न १३औं दक्षिण एशियाली खेलकुद (साग) को लागि बन्द प्रशिक्षणमा रहेका नेपालका टेबल टेनिस खेलाडीलाई एक साता विशेष प्रशिक्षण दिने भएका छन् ।
उनी नेपाली टोलीलाई विशेष प्रशिक्षण दिन शुक्रबार नेपाल आइपुगेका छन् । उनको प्रशिक्षणमा खेलाडीहरुको खेल स्तर बृद्धि हुने अपेक्षा गरिएको छ ।
प्रशिक्षक पाभेलसँग लामो समयको प्रशिक्षण अनुभव छ । उनले स्वीट्जरयाण्डको राष्ट्रिय टोलीलाई १८ वर्ष, जर्मनीमा ९ वर्ष, चेक गणतन्त्र र श्रीलङ्कको समेत प्रशिक्षक रहिसकेका छन् ।
टेवल टेनिसबाट महिला र पुरुषमा समान ५–५ गरी १० खेलाडी छनोट भएका छन् । महिलामा नविता श्रेष्ठसहित ५ खेलाडी रविना महर्जन, दीक्षा तामाङ, एलिना महर्जन र सिक्का सुवाल छनोट भएका छन् ।
पुरुषतर्फ विनेश खनिया, पुरुषोत्तम बज्राचार्य, शिव सुन्दर गोथे र संयोग कपाली छनोट भएका छन् । राष्ट्रिय च्याम्पियन स्यान्टु श्रेष्ठलाई अर्काे एक मौका दिइएको छ । स्यान्टु सवारी दुर्घटनामा परेपछि अहिले उपचारकै क्रममा छ ।
स्यान्टुलाई रिकभरको लागि ४० दिनको समय दिइएको र त्यसपछि छनोटमा पाँचौ स्थानमा रहेका सुनिल महर्जनसँग प्रतिस्पर्धा गर्नुपर्नेछ । जित्नेले सागको टोलीमा समावेश हुने संघले जनाएको छ ।
