काठमाडौं (हाम्रो खेलकुद) – १३औं संस्करणको सुजन मेमोरियल सिक्स ‘ए’ साइड फुटबल प्रतियोगिता शनिबारदेखि शुरु हुने भएको छ ।

आयोजक समाज कल्याण खेलकुद केन्द्र क्लब (एसडब्लुएससी) नयाँ बजारले प्रतियोगिताको १३औं संस्करण २ देखि ९ कात्तिकसम्म हुने क्लबका अध्यक्ष पवन कार्कीले जानकारी गराए ।

प्रतियोगितामा आयोजको ३ टोलीसहित काठमाडौं भ्यालीका ३३ टिमको सहभागिता रहेको छ । नकआउटका आधारमा हुने खेलहरु नयाँबजार धारास्थित सोसल ग्राउन्ड आइ ब्लक टाउन प्लानिङको खुल्ला खेल मैदानमा हुनेछ । पहिलो राउन्ड २० मिनेट, दोस्रो राउन्ड २५ र फाइनल ३५ मिनेटको हुने आयोजकले जानकारी गराएको छ ।

प्रतियोगिताको विजेताले ८० हजार रुपैया तथा दोस्रो हुनेले ४० हजार रुपैया हात पार्नेछन् । उत्कृष्ट खेलाडी, सर्वाधिक गोलकर्ता र फेयर प्ले टिमलाई पनि पुरस्कारको व्यवस्था गरिएको छ ।क्वाटरफाइनलका खेलपछि म्यान अफ दि म्याचको पुरस्कार प्रदान गरिने आयोजकले जनाएको छ ।

सुजन गिरी मनाङ–मस्र्याङ्दी क्लब २०६२–०६३ सिजनको जुनियरतर्फको कप्तान रहेका थिए । तिनै युवा प्र्रतिभाशाली खेलाडी सुजनको सम्झनामा हरेक वर्ष प्रतियोगिता आयोजना गर्दै आइरहेको छ । एसडब्लुएससीले १२औं संस्करण सफलतापुर्वक सम्पन्न गरिसकेको छ ।