काठमाडौं (हाम्रो खेलकुद) – १३औं दक्षिण एसियाली खेलकुद प्रतियोगिताको तयारीका लागि नेपाल–कोरिया संयुक्त प्रशिक्षण कार्यक्रमअन्तरगत नेपाली भारोत्तोलन टोली कोरियो जाने भएको छ ।

राष्ट्रिय खेलकुद परिषद्का सदस्यसचिव रमेश कुमार सिलवालले टोलीलाई शुक्रबार विदाई गरेका छन् । कोरियन भारोत्तोलन महासंघको निमन्त्रणमा भारोत्तोलोलन टोली दोस्रोपटक प्रशिक्षणमा जान लागेको हो । टोली शनिवार कोरिया प्रस्थान गर्नेछन् । कोरियाको नेसनल ट्रेनिङ सेन्टर चिनचोङमा खेलाडीले विशेष प्रशिक्षण लिने छन् ।

सहभागी खेलाडीहरुमा ५५ केजीमा सन्जु चौधरी, ६४ केजीमा देवी कुमारी चौधरी, ७६ केजीमा तारा देवी पुन, ८१ केजीमा लक्ष्मी वन विष्ट रहेका छन् । त्यसैगरी पुरुषतर्फ ७३ केजीमा कमल बहादुर अधिकारी, ८१ केजीमा विकास थापा, ९६ केजीमा विशाल सिं विष्ट, १०९ केजीमा सागर भण्डारी रहेका छन् ।

प्रशिक्षण कार्यक्रममा दुई कोचको समेत सहभागीता रहेको छ । जसमा वरिष्ठ मुख्य प्रशिक्षक राम पौडेल र वरिष्ठ प्रशिक्षक विकास शाक्यले खेलाडीको टोलीसँगै कोरियामा प्रशिक्षणका लागि जाँदैछन् । यो प्रशिक्षणले १३औं सागबाट नेपालले भारोत्तोलनमा उत्कृष्ट प्रदर्शन गर्ने विश्वास नेपाल भारोत्तोलन संघले लिएको छ ।