काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग अन्तर्गत आज (आइतबार) १०औं राउन्डको दोस्रो दुई खेल हुनेछ ।

त्रिपुरेश्वरस्थित दशरथ रंगशालामा हुने दिनको पहिलो खेलमा यति हिमालयन शेर्पा र संकटा क्लबबीच मध्यान्ह १२ बजे तथा अर्काे खेलमा दुई विभागीय टोली त्रिभुवन आर्मी क्लब र नेपाल पुलिसबीच दिउँसो ३ बजे प्रतिस्पर्धा हुँदैछ ।

उपाधिको प्रवल दावेदार आर्मी विभागीय डर्वीमा पुलिसलाई पराजित गर्दै लिगको शीर्षस्थानमा पूनरागमन गर्ने लक्ष्यमा हुनेछ । आर्मी र पुलिसबीचको खेल प्रतिष्ठाको लडाई समेत हुनेछ ।
उपाधि यात्रालाई जीवितै राख्न आर्मीलाई पुलिसविरुद्ध जित निकाल्न आवश्यक छ । बराबरी या हारले आर्मीको उपाधि यात्रा झिनो बन्ने छ । यस हिसावले खेल आर्मीलाई फाइनल सरह नै छ ।

आर्मीसँग भरत खवास, नवयुग श्रेष्ठ, जर्जप्रिन्स कार्की, सन्तोष तामाङ, दिनेश हेन्जन, सेसेहाङ आङदेम्वे, विकेश कुथु, सुमन अर्याल र विकास खवास जस्ता खेलाडीको साथ छ ।
आर्मी २० अंकसहित दोस्रो स्थानमा छ । १० खेल खेलेको शीर्षस्थानको मछिन्द्रको २२ अंक छ ।

यता, पछिल्ला खेलमा उत्कृष्ट प्रदर्शन गर्दै आईरहेको पुलिस आर्मीलाई पराजित गर्दै सुपर सिक्सको यात्रालाई बलियो बनाउने दाउमा हुनेछ । १४ अंक जोडेको पुलिस छैटौं स्थानमा छ ।
सरस्वती युथ क्लबसँग अप्रत्यासित हारले रेलिगेसन खतरामा रहेको शेर्पा संकटालाई हराउदै रेलिगेसनबाट बच्ने दाउमा हुनेछ ।

शेर्पा ७ अंकसहित १२औं स्थानमा तथा संकटा १२ अंक जोडेर आठौं स्थानमा छ । यता, संकटा पनि शेर्पालाई पराजित गर्दै सुपर सिक्सको यात्रामा उभिने दाउमा हुनेछ ।