पर्वत (हाम्रो खेलकुद) – चौथो दिदिबहिनी कप राष्ट्रिय महिला भलिबल प्रतियोगिताको शुक्रबारको लागि तय भएको नेपाल एपिएफ क्लब र नेपाल पुलिस क्लबबीचको फाइनल खेल शनिबार हुने भएको छ । 

 

शुक्रबार दिनभर नै वर्षा भएपछि फाइनलसहित तेस्रो स्थानको खेल प्रभावित भएको र स्थगित फाइनल र तेस्रो स्थानको खेल शनिबार हुने प्रतियोगिता संयोजक तथा एसियन रेफ्री क्यान्डिडेट टहलसिंह थापामगरले जानकारी गराए ।

पर्वतस्थित जलजला गाउँपालिका–३ मा १३औं गण्डकी प्रदेशस्तरीय महिला महोत्सवको अवसरमा आयोजित प्रतियोगितामा बिहीबार एपिएफले होङ्ग्वान्जी न्यु डायमण्ड स्पोर्ट्स क्लबलाई तथा पुलिले त्रिभुवन आर्मी क्लबलाई सोझो सेटमा पराजित गर्दै फाइनल भिडन्त पक्का गरेको थियो ।

आर्मी र डायमन्डले तेस्रो स्थानको लागि प्रतिस्पर्धा गर्दैछ । तेस्रो स्थान बिहान ८ बजे र फाइनल १० बजे हुने आयोजकले जनाएको छ ।
एपिएफ र पुलिसले माघ अन्तिम साता काठमाडौंमा सम्पन्न १५औं ढोरपाटन महिला डबल लिग भलिबल प्रतियोगिताको अन्तिमा तथा फाइनल सरहकै खेलमा प्रतिस्पर्धा गर्दा एपिएफ विजयी हुदै च्याम्पियन बन्न सफल भएको थियो ।

प्रतियोगिताको विजेताले २ लाख तथा दोस्रो हुनेले १ लाख रुपैया हात पार्नेछन् । तेस्रो हुनेले ५० हजार हात पार्नेछन् । सर्वोत्कृष्ट खेलाडी तथा विधागत उत्कृष्ट खेलाडीलाई पनि नगद पुरस्कार हात पार्नेछन् ।