काठमाडौं (हाम्रो खेलकुद) – अखिल नेपाल फुटबल संघ (एन्फा) ले मंसिर दोस्रो सातादेखि विद्यालय लिग खेलाउने तयारी थालेको छ ।

एन्फाले मंगलबार एक सुचना जारी गर्दै सुचना प्रकाशित भएको १५ दिनभित्र एन्फा सचिवालयमा प्रतियोगिता खेल्न इच्छुक काठमाडौं, ललितपुर, भक्तपुर र काभ्रेपलान्चोकका विद्यालयहरुलाई नाम दर्ता गर्न आह्वान गरेको छ । एन्फाले विद्यालय लिगबाट खेलाडी छनोट गरी उमेर समूहको राष्ट्रिय टिमसम्म लैजाने उद्देश्यसहित लिग आयोजना गर्न लागेको जनाएको छ ।

एन्फाले युवा फुटबल खेलको बिकास र विस्तार गर्न यसवर्षदेखि १५ वर्षमुनिका उमेर समूहको काठमाडौं उपत्यका (काठमाडौं, ललितपुर, भक्तपुर) र काभ्रे जिल्लामा रहेका मापदण्ड पुरा गरेका विद्यालयका विद्यार्थीको सहभागितामा अन्तर विद्यालय लिग फुटबल प्रतियोगिता मंसिर दोस्रो सातादेखि गर्ने तयारी गरेको हो ।

विद्यालय लिगका लागि एन्फाले विभिन्न मापदण्ड राखेको छ । सहभागी हुने विद्यालयले न्युनतम एएफसी ‘सी’ लाईसेन्स कोर्ष पुरा गरेका प्रशिक्षक टिममा अनिवार्य राख्नुपर्ने प्रावधान राखेको छ । विद्यालयको आफ्नै यु–१५ टिम हुनेपर्ने र टिममा कम्तीमा पनि २३ देखि ३० सम्म खेलाडी रहनुपर्नेछ ।

यस्तै प्रतियोगितामा सहभागी जनाउने विद्यालयको आफ्नै खेल मैदान (चौडाई कम्तिमा ३५ देखी ५० र लम्बाईमा कम्तिमा ६० देखि १०० मिटर ) हुनुपर्नेछ । र त्यहाँ होम म्याच खेलाउन सक्ने सम्भाव्यता हुनुपर्नेछ ।