काठमाडौं (हाम्रो खेलकुद) – १३औं दक्षिण एसियाली खेलकुद (साग) का स्वर्णपदक विजेता तथा टोकियो ओलम्पिकका लागि छनोट भएका धावक गोपीचन्द्र पार्की गृहनगरमा सम्मानित भएका छन् ।
धावक गोपीचन्द्रलाई कैलाली जिल्ला तथा नेपाल एथलेटिक्स संघले २५ हजार रुपैयाँसहित सम्मान गरेको हो । यस्तै राष्ट्रिय खेलकुद परिषद् (राखेप) का बोर्ड सदस्य एकेन्द्र कुँवरले व्यक्तिगत सहयोग स्वरुप १५ हजार रुपैयाँ प्रदान गर्दै धनगढीबाट फर्किएपछि धावक गोपीचन्द्रलाई केही खेल सामाग्री सहयोग गर्ने प्रतिवद्वता जनाएका छन् ।
सम्मानित भएपछि धावक गोपीचन्द्रले अझै सफलता हासिल गर्न मिहेनत गरिरहेको बताउदै यसले उर्जा थपेको बताएका छन् । सुदुरपश्चिम प्रदेशका सामाजिक विकास मन्त्री कृष्णराज सुवेदीले टोकियो ओलम्पिकमा जाँदा प्रदेशले सहयोग गर्ने बताएका छन् ।
धावक गोपीचन्द्रले गत मसिंर ६ गते नेपालगन्जमा सम्पन्न धारा नेपालगन्ज म्याराथनको च्याम्पियन बन्दै ओलम्पिक यात्रा सुनिश्चित गरेका थिए ।
