भरतपुरको पहिलो जित

काठमाडौं (हाम्रो खेलकुद) – भरतपुर महानगर खेलकुद परिषदले राजधानीमा जारी पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फ पहिलो जित निकालेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सोमबार भएको खेलमा भरतपुरले ढोरपाटन स्पोर्ट्स क्लबलाई ३–० को सोझो सेटमा हराउँदै लिगमा पहिलो जित निकालेको हो । एकपक्षीय खेलमा भरतपुरले ढोरपाटनमाथि २५–२१, २५–१२ र २५–१३ को सहज जित निकाल्यो ।

लिगमा पहिलो जितसँगै भरतपुरले ४ खेलबाट ३ अंक जोडेको छ । ढोरपाटनले ५ खेल खेल्दा अंकको खाता खोल्न सकेको छैन ।

लिगमा सोमबार महिला तर्फ यसपछि एपिएफ र आर्मीबीच प्रतिस्पर्धा हुनेछ । पुरुषतर्फ हेल्प नेपाल र पुलिस, एपिएफ र आर्मी तथा मणि मुकुन्द र नयाँबजारबीच प्रतिस्पर्धा हुनेछ ।