काठमाडौं (हाम्रो खेलकुद) – विभागीय त्रिभुवन आर्मी क्लबलाई हराएसँगै टिप टप हेल्प नेपाल स्पोर्ट्स क्लब पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबलको पुरुषतर्फको फाइनलमा प्रवेश गरेको छ ।

हेल्प नेपालले एक खेल बाँकी छदै फाइनलमा स्थान पक्का गरेको हो । हेल्प नेपालले लिगको अन्तिम खेलमा बुधबार नेपाल एपिएफ क्लबसँग खेल्नेछ । उक्त खेलमा हार बेहोरेपनि हेल्प नेपाललाई फाइनल यात्रामा प्रभाव पार्ने छैन । अपराजित रहेको हेल्प नेपालको ५ खेलबाट १५ अंक पुगेको छ । दोस्रो स्थानमा रहेको नेपाल एपिएफ क्लबको १० अंक छ । आर्मीको ९ अंक छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार भएको खेलमा शुरुवात देखि नै अग्रता लिएको हेल्प नेपालले पहिलो सेट २५–१७ ले सहजै आफ्नो पक्षमा पारेको थियो । प्रतिस्पर्धात्मक दोस्रो सेटमा आर्मीले चुनौती दिएपनि हेल्प नेपालले २५–१९ ले आफ्नो पक्षमा पारेको थियो ।

सुरुवातमा पछि परेको आर्मीले हेल्प नेपाललाई ६–६ को बराबरी गर्न सफल भएको थियो । १२–१२ को अवस्थाबाट हेल्प नेपालले अग्रता लिदै दोस्रो सेट आफ्नो पक्षमा पारेको थियो । तेस्रो सेट हेल्प नेपालले २५– १६ ले सहजै आफ्नो पक्षमा पार्दै आर्मीलाई सोझो सेटमा पाखा लगायो ।

त्यसअघि त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार भएको खेलमा पुलिसले एपिएफमाथि ३–२ को संघर्षपुर्ण जित निकालेको हो । प्रतिस्पर्धात्मक खेलको सुरुवाती दुई सेट जितेको पुलिसले त्यसपछिको दुई सेट गुमाएपनि निर्णायक सेटमा जित हात पारेको थियो ।

प्रतिस्पर्धात्मक पहिलो सेट पुलिसले २५–२१ ले आफ्नो पक्षमा पारेको थियो । प्रतिस्पर्धात्मक दोस्रो सेटमा पुलिसले २५–२३ को जित निकाल्दै जित नजिक पुगेपनि पुलिसले तेस्रो र चौथो सेट २०–२५ र १७–२५ ले गुमाएको थियो । निर्णायक सेटमा १५–१३ को संघर्षपुर्ण जित निकाल्यो ।

महिलातर्फ भने होंगान्जी न्यू डायमन्डले पुलिसमाथि ३–० कोसोझो सेटमा जित निकालेको थियो । एकपक्षीय खेलमा डायमन्डले पहिलो सेटमा २५–२२ ले जितेको दोस्रो सेटमा पनि २५–२२ को जित निकालेको डायमन्डले तेस्रो सेटमा २५–१६ को जितमा निकाल्यो ।

जितपछि डायमन्डको ५ खेलबाट ११ अंक पुगेको छ । दोस्रो स्थानमा रहेको एपिएफको पनि ११ अंक नै छ । आर्मी र पुलिसको समान ८ अंक छ । भरतपुर महानगर खेलकुद परिषद र ढोरपाटन स्पोर्ट्स क्लब लिग चरणबाट बाहिरिएको छ । यस्तै मंगलबारै भएको अर्काे खेलमा नेपाल एपिएफ क्लबले भरतपुर महानगर खेलकुद परिषदलाई २५–१३, २५–७ र २५–९ को सोझो सेटमा पराजित गर्दै फाइनल पुग्ने सम्भावना जीवित बनाएको छ ।

प्रतियोगितामा पुरुषतर्फ ७ तथा महिलातर्फ ६ टोलीको सहभागिता छ । लिगपछि शीर्ष दुई टोलीले उपाधिका लागि प्रतिस्पर्धा गर्नेछ । लिग अवधिभर खेलाडी र अफिसियलको बिमा गरिने संघले जनाएको छ । प्रतियोगिताको पुरुष र महिला दुवैतर्फको विजेताले ३ लाख रुपैयाँ हात पार्नेछन् ।

दोस्रो हुनेले १ लाख ७५ हजार, तेस्रोले ७५ हजार तथा चौथो हुने टोलीले ३७ हजार ५ सय प्राप्त गर्नेछन् । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार हात पार्नेछन् ।