काठमाडौं (हाम्रो खेलकुद) – विभागीय नेपाल पुलिस क्लब पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबलको महिलातर्फको फाइनलमा प्रवेश गरेको छ ।
लिग चरणको अन्तिम खेलमा विभागीय त्रिभुवन आर्मी क्लबलाई ३–० को सोझो सेटमा पराजित गर्दै पुलिसले फाइनलमा स्थान पक्का गरेको हो । अब पुलिसले उपाधिका नेपाल एपिएफ क्लब र होङ्गान्जी न्यु डायमन्ड स्पोर्ट्स क्लबको विजेतासँग बिहीबार प्रतिस्पर्धा गर्नेछ ।
त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बुधबार भएको खेलमा पुलिसले पहिलो सेटमा २६–२४ को जित निकालेको थियो । एक समय ९–१३ ले पछि रहेको पुलिसले उत्कृष्ट पूनरागमन गर्दै खेललाई २३–२३ को बराबरीमा ल्याउदै जितको आधार तयार पारेको थियो ।
त्यसपछि २४–२४ को बराबरीबाट पुलिसले २ अंक जोड्दै पहिलो सेट आफ्नो पक्षमा पारेको थियो । दोस्रो सेटमा पुलिसले २५–१७ को सहज जित निकालेको थियो । तेस्रो सेटमा पनि पुलिसले पछि परेको अवस्थामा पूनरागमन गर्दै २८–२६ को जित निकाल्दै फाइनलमा पुग्न सफल भयो ।
आज बुधबार महिला तर्फ लिग चरणको अन्तिम खेलमा न्यु डायमन्ड र एपिएफबीच प्रतिस्पर्धा हुनेछ । यस खेलमा सोझो सेटमा जित हात पार्ने टोलीले फाइनलमा स्थान बनाउनेछ । प्रतियोगितामा पुरुषतर्फ ७ तथा महिलातर्फ ६ टोलीको सहभागिता छ । लिगपछि शीर्ष दुई टोलीले उपाधिका लागि प्रतिस्पर्धा गर्नेछ । लिग अवधिभर खेलाडी र अफिसियलको बिमा गरिने संघले जनाएको छ ।
प्रतियोगिताको पुरुष र महिला दुवैतर्फको विजेताले ३ लाख रुपैयाँ हात पार्नेछन् । दोस्रो हुनेले १ लाख ७५ हजार, तेस्रोले ७५ हजार तथा चौथो हुने टोलीले ३७ हजार ५ सय प्राप्त गर्नेछन् । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार हात पार्नेछन् ।
