काठमाडौं (हाम्रो खेलकुद) – युवा ब्याटर भीम सार्कीको अर्धशतकसँगै चितवन टाइगर्सले एभरेष्ट प्रिमियर लिग (इपिएल) को फाइनलमा पोखरा राइनोजलाई हराउँदै उपाधि नजिक पुगेको छ ।

जितको लागि १ सय १२ रनको सामान्य विजयी लक्ष्य पछ्याएको चितवनले १२ ओभरमा ४ विकेट गुमाउँदै ८३ रन बनाएको छ । चितवनका भीम सार्की ३५ बलमा ५ चौका र २ छक्का सहित ५१ रनमा अविजित छन् । उनले ३५ बलमा अर्धशतक पूरा गरेका थिए । भीमको जारी इपिएलमा यो दोस्रो अर्धशतक हो ।

तीव्र गतिका बलर नन्दन यादवको पहिलो ओभरको दोस्रो बलमै ओपनर हासिम अन्सारी विकेटकिपर विनोद भण्डारीबाट शून्यमा क्याच आउट भएका थिए । दोस्रो ओभरको तेस्रो बलमा किशोर महतोले करिम जन्नतलाई शून्यमा क्याच आउट गराएका थिए । किशोरले चौथो ओभरको अन्तिम बलमा मोहम्मद शाहजादलाई ११ रनमा विपिन रावलबाट क्याच गराएका थिए ।

चौथो विकेटका लागि भीम र दीलिप नाथले ५४ रनको साझेदारी गर्दै जित सहज बनाएका थिए । दीलिप १८ रनमा क्याच आउट भए ।

त्यसअघि टियु क्रिकेट मैदानमा टस हारेर पहिला ब्याटिङ थालेको पोखरा १७.५ ओभरमा १ सय ११ रनमा अल आउट भएको थियो । पोखराका असेला गुणरत्नेले २४ बलमा ३ चौका र १ छक्का सहित सर्वाधिक ३४ रनको योगदान दिए । ओपनर रिचार्ड लेभीले १५ बलमा ५ चौका सहित २६ रनमा क्याच आउट भए ।

सुरुवात राम्रो पाएपनि मध्यक्रम र तल्लोक्रमका ब्याटरको खराब प्रदर्शनपछि पोखरा सस्तैमा समेटिएको हो । पोखरा ७ खेलाडीले दोहोरो अंकमा रन बनाउन सकेनन् ।