काठमाडौं (हाम्रो खेलकुद)– १३ औं दक्षिण एसियाली खेलकुद (साग) का दोहोरो स्वर्ण पदक विजेता मन्डेकाजी श्रेष्ठले १९ औं एसियाली खेलकुद नखेल्ने भएका छन् । एसियाड सेप्टेम्बर १० देखि २५ सम्म चीनको हान्झाउमा हुँदैछ ।

एसियाली खेलकुदको प्रारम्भिक छनोटका रुपमा रहेको प्रथम कृष्ण प्रसाद भट्टराई स्मृति राष्ट्रिय कराते प्रतियोगितामा भाग नलिएपछि उनले एसियाड खेल्ने छैनन् । मण्डेले दुई वर्षअघि स्वदेशमा भएको १३ औं सागमा एकल र टिम काता दुवैमा स्वर्ण पदक जितेका थिए । एउटै सागमा दोहोरो स्वर्ण पदक जित्ने उनी करातेका एक्लो खेलाडी हुन् ।

राष्ट्रिय प्रतियोगितामा उनी नेपाल पुलिस क्लबको काता प्रशिक्षकका रुपमा सहभागी छन् । १३ औं सागमा करातेको टिम काताका मण्डेका सहकर्मी महसुस मुक्तानले पहिलो दिन एकल कातामा स्वर्ण पदक जितेका थिए । उनले उपयुक्त समयमा सन्यास लिने बताएका छन् । मेरो लक्ष्य भनेको सागमा स्वर्ण पदक जित्ने थियो । दोहोरो स्वर्ण पदक जिते । त्यसका लागि लागि मैले निकै लामो प्रतीक्षा गर्नु परेको थियो, मण्डेले भने, अब नयाँ खेलाडीलाई आफ्नो अनुभव बाड्ने छु । उपयुक्त समय आएपछि सन्यासको घोषणा गर्नेछु । अबको दिनमा प्रशिक्षणमा लाग्नेछु ।

नेपाल लोकतान्त्रिक खेलकुद संघ र ललिलपुर जिल्ला प्रमुख डोजोको संयुक्त आयोजनामा भएको प्रतियोगितालाई राष्ट्रिय खेलकुद परिषद् (राखेप) र नेपाल कराते महासंघले १९ औं एसियाली खेलकुदको प्रारम्भिक छनोटको मान्यता दिएको छ । तीन दिन सम्म चल्ने प्रतियोगितामा ७ प्रदेश, ३ विभाग (सेना, प्रहरी र एपिएफ) का २ सय १० खेलाडीको सहभागिता रहेको छ ।

महिलातर्फ ८ र पुरुषतर्फ ९ इभेन्ट्समा २१ स्वर्ण, २१ रजत र ४२ कास्य पदकका लागि प्रतिस्पर्धा हुनेछ । प्रतियोगितालाई सम्झना ल्याबले मुख्य प्रायोजन गरेको छ । लिनिङ र सान सोजु सह प्रायोजक रहेको प्रतियोगितालाई ललितपुर महानगरपालिका, गोदावरी नगरपालिका र बागमती गाउँपालिका सहयोगकी रुपमा रहेका छन् ।