काठमाडौं (हाम्रो खेलकुद)– बागमती प्रदेश सरकारले खेलकुद क्षेत्रमा उल्लेखनिय योगदान पुर्याएको भन्दै राष्ट्रिय खेलकुद परिषद् (राखेप) का पूर्व कोषाध्यक्ष ललितपुरका मीनकृष्ण महर्जनलाई प्रदेश शान पदकबाट सम्मानित गरेको छ ।

त्यस्तै प्रथम बागमती प्रदेश खेलकुद प्रतियोगितामा उत्कृष्ट खेलाडी मकवानपुरका फुटबल खेलाडी समिराज थोकर पनि प्रदेश शानबाट सम्मानित भएका छन् । प्रदेशको राजधानी हेटौडामा बिहीबार आयोजित एक कार्यक्रममा बागमती प्रदेशका मुख्य मन्त्री राजेन्द्र पाण्डेले महर्जन र थोकरलाई सम्मान गरेका थिए ।

करातेका पूर्व अन्तर्राष्ट्रिय खेलाडी समेत रहेका महर्जन नेपाल कराते महासंघका पूर्व पदाधिकारी, कराते प्रशिक्षक र अन्तर्राष्ट्रिय रेफ्री हुन् । उनले नेपाली काग्रेसको खेलकुद विभागको सचिवको जिम्मेवारी समेत निर्वाह गरिसकेका थिए ।
खेलकुद र करातेका विभिन्न जिम्मेवारीमा रहँदै खेलकुद विकासमा आफ्नोतर्फबाट सक्दो प्रयासलाई प्रदेश सरकारले मुल्याङ्कन गरेकोमा महर्जनले प्रदेश सरकारलाई धन्यवाद दिए ।

‘सम्मानका लागि भनेर काम गरेको त होइन,’ उनले भने,‘ तर, आफूले गरेको कामलाई सरकारले कदर गर्दा गर्व महसुस हुने रहेछ । भविष्यमा पनि खेलकुद विकासका लागि आफ्नोतर्फबाट सक्दो प्रयास गर्नेछु ।’