काठमाडौं (हाम्रो खेलकुद) – मलेसियाको क्वालालम्पुरमा भएको सातौं केएल मेयर कपमा नेपालको च्याम्पियन्स मार्सल आर्टस् का खेलाडीले ५ स्वर्णसहित ११ पदक जितेको छन् । च्याम्पियन्सका ५ खेलाडीले स्वर्ण, ३ खेलाडीले रजत र ३ खेलाडीले कास्य पदक जितेका छन् ।
आइतबार सम्पन्न प्रतियोगितामा विजय श्रेष्ठले पुरुष सिनियर ६० केजी, अनिल बरामले पुरुष जुनियर ६८ केजी, निमा तामाङले महिला जुनियर ५३ केजी, अयुष्मा बलामीले महिला जुनियर ५९ केजीमा र डायना ओझाले महिला सिनियर ६८ केजीमा स्वर्ण पदक जितेको च्याम्पियन्स मार्सल आर्टसले जनाएको छ ।
त्यस्तै यामबहादुर सलामले पुरुष सिनियर ५५ केजीमा, मिस्ली श्रेष्ठले महिला सिनियर ५० केजी र युनिका मगरले महिला सिनियर कातामा रजत पदक जितेकी छिन् । पुरुष सिनियर ६० केजीमा सुविन खत्रीले, पुरुष सिनियर ८४ केजीमा आशिष धामीले र पुरुष सिनियर कातामा मनिष सोनकरले कास्य पदक जितेका छन् । प्रतियोगितामा च्याम्पियन्स मार्सल आर्टसका १५ खेलाडीसहित २१ जनाको सहभागिता रहेको थियो ।
