काठमाडौं (हाम्रो खेलकुद)– छैटौं एसियन यू २० कुराँश च्याम्पियनसिप भाग लिन नेपाली टोली सोमबार थाइल्यान्ड जाने भएको छ । ३ खेलाडी, प्रशिक्षक र संघका दुई पदाधिकारीसहित ६ सदस्यीय टोली त्यसतर्फ जान लागेको हो ।
थाइल्यान्डको पतायामा जुन १७ देखि २१ सम्म च्याम्पियनसिपको आयोजना हुने बताइएको छ । संघका उपाध्यक्ष दीपबहादुर सिंहको नेतृत्वमा रहेको टोलीको पुरुष खेलाडीमा विपल तुलाधार (५५ केजी), शेरबहादुर घर्तीमगर (६० केजी) र महिला खेलाडी कृति शेर्मा (५७ केजी) ले प्रतिस्पर्धा गर्नेछन् । टोलीको प्रशिक्षकमा प्रताप घिसिङ रहेका छन् ।
च्याम्पियनसिपकै दौरानमा हुने एसियाली कुराँश महासंघको साधारण सभामा संघकी महासचिव प्रतिक्षा खरेलले भाग लिने छिन् । टोलीलाई राष्ट्रिय खेलकुद परिषद्की सदस्य इन्दिरा निरौला ,संघका अध्यक्ष ध्रुबराज न्यौपाने र संघका सल्लाहकार युवराज श्रेष्ठले आइतबार विदाई गरे ।
