कन्चनपुर (हाम्रो खेलकुद) – सुदूरपश्चिम प्रदेश कन्चनपुर जिल्लाको भिमदत्त नगरपालिका ३ स्थित लिटिल बुद्ध एकेडेमी सेकेन्डरी स्कुलले नेपाली ओलम्पियनका सन्तानलाई नर्सरीदेखि प्लस टु सम्म अध्ययनका लागि छात्रबृति दिने घोषणा गरेको छ ।

नेपाल ओम्पियन्स संघको संयोजनमा मंगलबार स्कुल टु ओलम्पिक कार्यक्रम पछि लिटिल बुद्धका प्रिन्सिपल श्याम सिंह मौनीले देशभरका ओलम्पियनका सन्तानलाई नर्सरी देखि प्लस टु सम्म निशुल्क अध्ययन गराउने घोषणा गरेका हुन् । विद्यालयको कदमका ओलम्पियन्स संघका अध्यक्ष दीपक विष्ट तथा नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले स्वागत गर्दै धन्यवाद दिएका थिए ।

सुदूरपश्चिम प्रदेश खेलकुद परिषद्को आयोजना र ओलम्पियन संघको संयोजनमा स्कुल टु ओलम्पिकको दुई दिने कार्यक्रम मंगलबार सम्पन्न भएको छ । दोस्रो दिन लिटिल बुद्धमा ओलम्पियनहरुले झण्डै ६ सय विधार्थीहरुकाबीचमा आ आफ्नो अनुभव साटेका थिए ।

ओलम्पियन कीर्तिमान धावक वैकुण्ठ मानन्धर, विष्णुबहादुर सिंह, डम्बरदत्त भट्ट, दीपक विष्ट, देवु थापा, प्रमिला रिजाल र खेलाडी संघका अध्यक्ष श्रेष्ठले आ आफ्नो खेल जीवनका चर्चा गर्दै मेहनत र अनुशासनले मात्र कुनै पनि क्षेत्रमा सफल बन्न सकिने बताए ।

विधार्थीहरुले ओलम्पियनहरुलाई उनीहरुको खेल जीवनका बारेमा प्रश्न गरेका थिए । ओलम्पियनहरुलाई स्वागत गर्दै लिटिल बुद्धका प्रिन्सिपल मौनीले भने, ‘तपाईहरुको उपस्थितिले खेलाडीको हौसला बढेको छ । विद्यालयका तर्फबाट हार्दिक धन्यावाद दिन चाहन्छौं ।’

स्कुल टु ओलम्पिकको पहिलो दिन सोमबार धनगढीमा विभिन्न विद्यालयका झण्डै ४ सय विद्यार्थीको सहभागिता रहेको थियो । ओलम्पियन्स संघका अध्यक्ष विष्टले स्कुल टु ओलम्पिक कार्यक्रम सम्बन्धित प्रदेश खेलकुद, प्याब्सनलगायतका संघ संस्थासँगको सहकार्यमा सबै प्रदेशमा आयोजना गर्ने लक्ष्य रहेको बताएका छन् ।