काठमाडौं (हाम्रो खेलकुद)– राष्ट्रिय भलिबल टोली तथा त्रिभुवन आर्मी क्लबका सेटर हरि हजुर थापा वैवाहिक बन्धनमा बाँधिएका छन् ।
ओखलढुंगाको चिशंखुगढी गाउँपालिका ४ का स्थायीबासिन्दा हरि हजुर सोही गाउँपालिका २ की मैया खड्कासँग बुधबार वैवाहिक बन्धनमा बाधिएका हुन् । सोही कारण उनी टाइगर ग्रुप अफ पोखरा नेपालको आयोजनामा जारी टाइगर कप भलिबल प्रतियोगितामा सहभागी छैनन् ।
गत वर्ष आर्मीले टाइगर जित्दा वा त्यसअघि फाइनल खेल्दा उनी टोलीका महत्वपूर्ण सदस्य थिए । माघ १ गते सातौं एनभिए क्लब च्याम्पियनसिपमा आर्मीबाट खेल्दा उनी उत्कृष्ट सेटर चुनिएका थिए । हरिहजुर झण्डै ८ वर्षदेखि राष्ट्रिय टोलीको सदस्य रहँदै आएका छन् ।२०६५ मा उनी नेपाली सेनामा भर्ती भएका थिए।
