काठमाडौं (हाम्रो खेलकुद)– छैटौं केएनपी नेरोलेक राष्ट्रिय महिला भलिबल प्रतियोगिताको दोस्रो दिन आइतबार दुई खेल हुँदैछन् ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा जारी प्रतियोगितामा पहिलो खेल एपिएफ क्लब र त्रिभवन आर्मी क्लबबीच हुनेछ । खेल दिउँसो १ः०० बजे सुरु हुने छ । दिउँसो ३ बजे सुरु हुने खेलमा न्यू डायमण्ड युथ स्पोर्टस क्लबले नेपाल पुलिस क्लबको सामना गर्नेछ ।

पहिलो दिन न्यू डायमण्ड र टाइगर कपको विजेता एपिएफले विजयी सुरुवात गरेका थिए । एपिएफले पुलिसलाई र न्यू डायमण्डले आर्मीलाई समान ३–० ले हराएका थिए । डायमण्ड र एपिएफको समान ३ अंक छ । आर्मी र पुलिसका लागि आज खाता खोल्ने मौका छ । डायमण्ड र एपिएफलाई भने लगातार दोस्रो खेल जित्दै शीर्ष २ को सम्भावनालाई बलियो पार्न अवसर हुने छ ।

२४ माघ गतेसम्म चल्ने प्रतियोगितामा सहभागी ४ टोलीले राउन्ड रोविनका आधारमा प्रतिस्पर्धा गरिरहेका छन् । राउन्ड रोविन पछि शीर्ष २ टोलीले उपाधिका लागि खेल्दा पुछारका दुई टोलीले तेस्रो स्थानका लागि प्रतिस्पर्धा गर्नेछन् । २०७२ सालदेखि हरेक वर्ष राष्ट्रिय महिला भलिबल प्रतियोगिता आयोजना गर्दै आइरहेको प्रतिष्ठानले कोरोनाका कारण पछिल्लो तीन वर्ष प्रतियोगिता गर्न सकेको थिएन ।

विजेताले ३ लाख, दोस्रोले १ लाख ५० हजार र तेस्रो हुने टोलीलाई ७५ हजार रुपैयाँ प्राप्त गर्नेछ । सर्वोत्कृष्ट खेलाडीलाई ५० हजार तथा विधागत उत्कृष्ट खेलाडी र इमर्जिङ प्लेयरले समान १५ हजार रुपयाँ प्राप्त गर्नेछन् । हरेक खेलको प्लेयर अफ दी म्याचले १० हजार रुपैयाँ पाउनेछिन् ।

विजेतालाई आयोजकले गोकर्ण फरेस्ट रिसोर्टमा रात्री भोजको व्यवस्था गर्नेछ । केएनपीको मुख्य प्रायोजन रहेको प्रतियोगितालाई राखेप, प्रदेश खेलकुद विकास परिषद् बागमती, चाँगुनारायण नगरपालिका, डाबर नेपाल, मुक्तिनाथ विकास बैंकले सहयोग गरेका छन् । इसेवामार्फत पनि प्रतियोगिताको टिकट खरिद गर्न सकिने प्रतियोगिताको प्रत्यक्ष प्रसारण हाम्रो खेलकुद डटकमले गरिरहेको छ ।