काठमाडौं (हाम्रो खेलकुद) – नेपाली पुरुष राष्ट्रिय भलिबल टोलीले किर्गिस्तानमा जारी काभा पुरुष भलिबल नेसन्स लिगमा आज (शुक्रबार) घरेलु टोली किर्गिस्तान ‘बी’ सँग प्रतिस्पर्धा गर्दैछ ।

नेपाल र किर्गिस्तान ‘बी’ बीचको खेल विस्केकस्थित चोलपोन एटिए कभर्डहलमा नेपाल िसमयअनुसार दिउँसो ३ः४५ बजेपछि हुनेछ ।

लिग चरणको शुरुवाती सबै चार खेलमा हार बेहोरेको नेपाल किर्गिस्तानको ‘बी’ टोलीलाई पराजित गर्दै नेसन्स लिगमा पहिलो जितको लक्ष्यमा कोर्टमा उत्रनेछ । नेपाली टोलीले राम्रो प्रदर्शन गरेपनि लगातार फिनिसिङ पोइन्टमा चुकिरहेको छ ।

नेपाली त्यही फिनिसिङलाई सुधार गर्दै कोर्टमा उत्रनेछ । तुर्केमिनिस्तानविरुद्ध सेट पोइन्टमा पुगेपनि नेपाललेल लगतार ३ अंक गुमाउँदै सेट नै गुमाउन पुगेको थियो ।

एसियाकै पावर हाउस इरानसँग मात्रै ३–० को सोझो सेटमा पराजित भएको नेपालले मंगोलिया, किर्गिस्तान र तुर्केमिनिस्तानसँग समान ३–१ को सेटमा नतिजा सुम्पिएको छ । नेपालले चार खेलमा १५ सेट खेल्दा १२ सेट गुमाएको छ । ३ सेट जितेको छ ।

टोलीसँग कप्तान हरि हजुर थापासँगै मान बहादुर श्रेष्ठ, हेमन्त बहादुर मल्ल, दुर्गा बहादुर खड्का, हरि अधिकारी, धन बहादुर भट्ट क्षेत्री, टेक राज अवस्थी, रविन चन्द र भीम गाहा छन् । यस्तै टोलीसँग राजेन्द्र विष्ट, लोकेन्द्र गिरी र सफल विक पनि टोलीमा छन् ।

यता, किर्गितानको ‘बी’ टोली नेपाललाई हराएर नेसन्स लिगमा दोस्रो जितको खोजीमा हुनेछ । किर्गिस्तानले तुर्केमिनिस्तानलाई ३–१ को सेटमा हराउँदा मंगोलिया र उज्वेकिस्तानसँग पराजित भएको थियो । किर्गिस्तानको ‘बी’ टोलीसँगको खेलपछि नेपालले लिग चराण्को अन्तिम खेलमा आइतबार उज्वेकिस्तानसँग खेल्नेछ ।

इरान, किर्गिस्तान र मंगोलियाको समान ९ अंक रहेपनि इरान, पहिलो, किर्गिस्तान दोस्रो र मंगोलिया तेस्रो स्थानमा छ । समान ३ अंक रहेपनि तुर्केमिनिस्तान चौथो, किर्गिस्तान ‘बी’ पाँचौ र उज्वेकिस्तान छैटौं स्थानमा रहँदा अंकविहीन नेपाल पुछारमा छ ।