काठमाडौं (हाम्रो खेलकुद) – मणिमुकुन्द भलिबल क्लबले आठौं आरबीबी–एनभिए महिला तथा पुरुष भलिबल च्याम्पियनसिपको‌ पुरुषतर्फ जित गरेको  छ ।

त्रिपुरेश्वरस्थित राष्ट्रिय खेलकुद परिरषदको कभर्ड हलमा जारी च्याम्पियनसिपको दोस्रो दिन आइतबार मणिमुकुन्दले न्यूटन भलिबल क्लबलाई ३-० ले हराएको छ। मणिमुकुन्दले न्युटनलाई २९-२७,२५-२३,२५-२३ ले पराजित गरेको हो।

त्यसअघि बुढानिलकण्ठ भलिबल क्लबले‌ कर्णाली प्रदेशलाई‌ ३-० को सोझो सेटमा हराएकाे छ। एकतर्फी खेलमा बुढानिलकण्ठले कर्णालीलाई २५-१०,२५-१८,२५- १७ ले पराजित गरेको हो।

पुरुषतर्फ दिनको‌ पहिलो खेलमा सुदूरपश्चिम प्रदेशले जावलाखेल भलिबल क्लबलाई ३-० ले हराएको छ ।
तीन भारतीय खेलाडी सम्मिलित सुदूरपश्चिमले जावलाखेलले २५-२१, २५-१३,२५-१७ ले हराएको थियो ।

महिलातर्फ साविक विजेता नेपाल पुलिस क्लबले विजयी सुरुवात गरेको थियो । पुलिसले कर्णाली प्रदेशलाई ३–० को सोझो सेटमा हराएको  थियो । पुलिसले २५-१२,२५-७,२५-८ ले खेल जितेको थियो। कर्णालीले यो च्याम्पिनसिपलाई राष्ट्रपति रनिङ शिल्डको तयारीको‌ रुपमा लिएको छ।

त्यसअघि दिनको पहिलो खेल एपिएफ क्लबले जितेको थियो। एपिएफले मधेश प्रदेशलाई ३–० को सोझो सेटमा हराएको छ । एपिएफले मधेशलाई २५–८, २५–७,२५–२ ले पराजित गरेको थियो । च्याम्पियनसिपमा आज पुरुषतर्फ १ खेल बाँकी छन् ।

महिलातर्फ समूह एमा एभरेष्ट क्लब, साविक विजेता पुलिस, त्रिभुवन आर्मी क्लब र कर्णाली छन् । अर्को समूहमा चन्द्रागिरी नगरपालिका न्यु डायमन्ड, नेपाल एपिएफ क्लब र मधेश प्रदेश छन् । दुवै समूहका शीर्ष २ टोली सेमिफाइनलमा प्रवेश गर्नेछन् ।

पुरुषतर्फ समूह ए मा हेल्प नेपाल स्पोर्ट्स क्लब, कोशी प्रदेश र ढोरपाटन क्लब छन् । समूह बी मा नेपाल एपिएफ क्लब, सुदूरपश्चिम प्रदेश र जावलाखेल भलिबल प्रशिक्षण केन्द्र छन् ।

समूह सी मा नेपाल पुलिस क्लब, कर्णाली प्रदेश र बुढानिलकण्ठ भलिबल क्लब छन् । समूह डी मा त्रिभुवन आर्मी क्लब, गण्डकी प्रदेश, मणिमुकुन्द भलिबल क्लब र न्युटन भलिबल क्लब रहेका छन् ।

नेपाल भलिबल संघको आयोजना तथा राष्ट्रिय वाणिज्य बैंकको मुख्य प्रायोजनमा आठ दिनसम्म चल्ने प्रतियोगितामा महिलातर्फ ७ र पुरुषतर्फ १३ टोलीको सहभागिता छ । दुवैतर्फको विजेता टोलीले ५ लाख, दोस्रो टोलीले २ लाख र तेस्रो टोलीले १ लाख २५ हजार रुपैयाँ प्राप्त गर्नेछ।