काठमाडौं (हाम्रो खेलकुद) – नेपाल पुलिस क्लब आठौं आरबीबी एनभिए भलिबल च्याम्पियनसिपको महिलातर्फको सेमिफाइनलमा पुगेको छ।

त्रिपुरेश्वर स्थित राष्ट्रिय खेलकुद परिषदको कभर्ड हलमा जारी च्याम्पियन्सिपको पाँचौं दिन बुधबार अर्को विभागीय टोली त्रिभुवन आर्मी क्लबलाई ३-० को सोझो सेटमा हराउँदै पुलिस समूह ए को विजेताका रुपमा अन्तिम चारमा पुगेको हो।

सेमिफाइनल पुगिसकेको तीन भारतीय खेलाडी सम्मिलित एभरेष्ट भलिबल क्लब समूहको उपविजेता बनेको छ । आर्मी र कर्णाली प्रदेश च्याम्पिनसिपबाट बाहिरिएका छन् ।

आज समूह बीमा चन्द्रागिरी नगरपालिका न्यु डायमण्ड महिला टिम र मधेश प्रदेशबीच प्रतिस्पर्धा भइरहेको छ । यसको नतिजाले सेमिफाइनल समीकरण पूरा हुनेछ।

समूहमा रहेको अर्को टोली एपिएफ र न्यु डायमण्डले समान १ खेल जितेका छन् । पुलिसले समूह बीको उपविजेता र एभरेष्टले समूह बीको विजेतासँग बिहीबार सेमिफाइनल खेल्नेछ।

पुरुषतर्फ आज दुईवटा क्वाटरफाइनलमा खेल हुनेछन् । पहिलोमा टिप टप हेल्प नेपाल र बुढानिलकण्ठ भलिबल क्लब तथा दोस्रोमा एपिएफ र गण्डकी प्रदेशबीच प्रतिस्पर्धा हुनेछ।

नेपाल भलिबल संघको आयोजना तथा राष्ट्रिय वाणिज्य बैंकको मुख्य प्रायोजनमा ८ दिनसम्म चल्ने प्रतियोगितामा महिलातर्फ ७ र पुरुषतर्फ १३ टोलीको सहभागिता छ । दुवैतर्फको विजेता टोलीले ५ लाख, दोस्रो टोलीले २ लाख र तेस्रो टोलीले १ लाख २५ हजार रुपैयाँ प्राप्त गर्नेछ ।