काठमाडौं (हाम्रो खेलकुद) – चन्द्रागिरी नगरपालिका न्यु डायमण्ड महिला भलिबल टिम र राष्ट्रिय टोलीकी कप्तान अरुणा शाहीसहित ३ भारतीय खेलाडी सम्मिलित एभरेष्ट भलिबल क्लबबीच आठौं आरबीबी एनभिए भलिबल च्याम्पियनसिपको महिलातर्फको दोस्रो सेमिफाइनलमा प्रतिस्पर्धा हुने भएको छ।

मधेश प्रदेशलाई‌ बुधबार ३-० को सोझो सेटमा हराएकाे न्यु डायमण्ड समूह बीको विजेता बन्दै एभरेष्टसँगको सेमिफाइनल भेट पक्का गरेको‌ हो । न्यु डायमण्डसँग २५-१०,२५-६, २५-८ ले पराजित भएसँगै मधेश प्रतियोगिताबाट बाहिरिएको छ।

एपिएफ समूह बीको उपविजेताका रुपमा सेमिफाइनल पुगेको छ । एपिएफले बिहीबार हुने पहिलो सेमिफाइनलमा नेपाल पुलिस क्लबको सामना गर्नेछ।

त्रिपुरेश्वर स्थित राष्ट्रिय खेलकुद परिषदको कभर्ड हलमा जारी च्याम्पियन्सिपको पाँचौं दिन बुधबार अर्को विभागीय टोली त्रिभुवन आर्मी क्लबलाई ३-० को सोझो सेटमा हराउँदै पुलिस समूह ए को विजेताका रुपमा अन्तिम चारमा पुगेको हो।

सेमिफाइनल पुगिसकेको तीन भारतीय खेलाडी सम्मिलित एभरेष्ट भलिबल क्लब समूहको उपविजेता बनेको छ । आर्मी र कर्णाली प्रदेश च्याम्पिनसिपबाट बाहिरिएका छन् ।

पुरुषतर्फ आज दुईवटा क्वाटरफाइनलमा खेल हुनेछन् । पहिलोमा टिप टप हेल्प नेपाल र बुढानिलकण्ठ भलिबल क्लब तथा दोस्रोमा एपिएफ र गण्डकी प्रदेशबीच प्रतिस्पर्धा हुनेछ।

नेपाल भलिबल संघको आयोजना तथा राष्ट्रिय वाणिज्य बैंकको मुख्य प्रायोजनमा ८ दिनसम्म चल्ने प्रतियोगितामा महिलातर्फ ७ र पुरुषतर्फ १३ टोलीको सहभागिता छ । दुवैतर्फको विजेता टोलीले ५ लाख, दोस्रो टोलीले २ लाख र तेस्रो टोलीले १ लाख २५ हजार रुपैयाँ प्राप्त गर्नेछ ।