काठमाडौं (हाम्रो खेलकुद)- शेरबहादुर खड्का स्मृति प्रतिष्ठानको‌ आयोजना यसै महिना राष्ट्रिय महिला भलिबल प्रतियोगिता हुने भएको छ ।

२०७० सालदेखि आयोजना भएको प्रतियोगिताको‌ यस अघि ६ संस्करण भइसकेको छ। सातौ संस्करण वैशाख १२ देखि १५ गतेसम्म त्रिपुरेश्वर स्थित राष्ट्रिय खेलकुद परिषदको‌ कभर्ड हलमा हुनेछ।

प्रतियोगितालाई‌ केएनपी नेरोलेकको मुख्य प्रायोजन गरेको छ। केएनपिएका कन्ट्री‌ हेड मनोजकुमार मिश्र र शेर बहादुर स्मृति प्रतिष्ठानका अध्यक्ष रन्जन खड्काले सम्झौता पत्रमा हस्ताक्षर गरे। सम्झौता पछि प्रतियोगिताको‌ नाम केएनपी नेरोलेक राष्ट्रिय महिला भलिबल प्रतियोगिता रहनेछ ।

प्रतियोगितामा साविक विजेता न्यु डायमन्ड युथ स्पोर्टस क्लब, नेपाल पुलिस क्लब, एपीएफ क्लव, त्रिभुवन आर्मी क्लब, र जावलाखेल भलिबल प्रशिक्षण केन्द्र गरी ५ टोलीको सहभागिता रहने मंगलबार आयोजित पत्रकार सम्मेलनमा जानकारी दिइयो।

नेपाल भलिबल संघको प्राबिधिक सहयोगमा सञ्चालन हुने प्रतियोगिताका सहभागी टोलीलाई दुई समूहमा विभाजन गरी लिगकम नकआउटका आधारमा खेल सञ्चालन गरिने बताइएको छ।

प्रतियोगिताको विजेता टोलीले ४ लाख ९९ हजार रुपैयाँ प्राप्त गर्नेछ। दोस्रो टोलीले २ लाख ५० हजार र तेस्रो हुने टोलीलाई १ लाख २५ हजार रुपैयाँ प्राप्त गर्नेछ। गत वर्षको‌ बन्दा यस पटक १ लाख ९९ हजार रुपैयाँ बढाइएको छ।

प्रतियोगिताकाे सर्वोत्कृष्ट खेलाडीले ५० हजार रुपैयाँ प्राप्त गर्नेछिन्‌। विधागततर्फ उत्कृष्ट हुनेलाई २५ हजार र हरेक खेलको प्लेयर अफ दी म्याचले १५ हजार रुपैयाँ प्राप्त गर्नेछन्।

प्रतियोगिताको उद्घाटनका अवसरमा एक जना राष्ट्रिय खेलाडीलाई ५० हजार रुपैयाँ सहित शेर बहादुर खड्‌का स्पेसल अवार्डबाट सम्मानित गरिने बताइएको छ

प्रतियोगितालाई राष्ट्रिय खेलकुद परिषद्, प्रदेश खेलकुद परिषद्, बागमती प्रदेश र विभिन्न कर्पोरेट हाउसहरुले सहयोग गरेका छन् । पुरस्कार राशि १३ लाख रुपैयाँ बढी रहेको प्रतियोगिताको अनुमानित बजेट करिब ५० लाख रुपैयाँ रहेकोमा बताइएको छ । प्रतिष्ठानले सामाजिक काम पनि गर्दै आएको छ।