काठमाडौं (हाम्रो खेलकुद)– प्रदेश खेलकुद परिषद् गण्डकीका सदस्य सचिव श्रीधर शर्माले आफ्ना खेलाडीलाई लान्छाना लगाएको र त्यसले उनीहरुको मनस्थितिमा असर परेको भन्दै चन्द्रागिरी नगरपालिका न्यु डायमण्ड महिला टिमले कारवाहीको माग गरेको छ ।

१४ औं केन्द्रीयस्तरको राष्ट्रपति रनिङ शिल्डमा बागमती प्रदेशमा सहभागी आफ्ना खेलाडीमाथि शर्माले लान्छाना लगाएको आरोप क्लबले न्यु डायमण्डले लगाएको छ । बागमतीबाट खेलेका सलिना बुढामगर, जेनिशा विश्वकर्मा र रेविका तामाङ बढी उमेरका खेलाडीलाई आरोप शर्माले लगाएको भन्दै न्यु डायमण्डले शुक्रबार प्रेस विज्ञप्ती जारी गर्दै शर्माको भत्र्सना गरेको छ ।

न्यु डायमण्डले रोल्पाकी सलिना २०६३ कात्तिक ८ गते, जेनिशा २०६४ असोज २५ गते र रेविका २०६६ असोज १६ गते जन्मेको दाबी गर्दै उनीहरु न्यु डायमण्ड एकेडेमीमा अध्ययन गरिरहेको जनाएको छ । राष्ट्रपति रनिङ शिल्डमा १८ वर्षका छात्र छात्राले मात्र भाग लिन पाउने प्रावधान थियो । न्यु डायमण्डले सलिना र रेविका कक्षा ९ र जेनिशा कक्षा १० मा अध्ययन गर्ने तयारीमा रहेको समेत उल्लेख गरेको छ ।

बागमती र गण्डकी प्रदेश टोलीबीच बिहीबार छात्रा भलिबलको फाइनलमा शर्माले खेलाडीको मनोबल गिराउने व्यवहार गरेको पनि न्यु डायमण्डको आरोप छ । राष्ट्रपति कप खेल्न स्थानिय तहवाट सम्पूर्ण प्रकृया पुरा गरि खेल्न पाउने व्यवस्था हुँदा त्यस्तो व्यहार घोर भत्र्सना योग्य रहेको भन्दै न्यु डायमण्डले कारवाहीको माग गरेको हो ।

गण्डकीका सदस्य सचिव शर्माले खेलाडीको उमेरमा शंका लागेर प्रोटेस्ट गरेको बताएका छन् । बागमतीबाट खेलेको खेलाडी उमेरको कैफियत छ भन्ने लाग्यो । हामीले छलफल गरेर नियमसंगत प्रोटेस्ट गरेका हों, शर्माले भने, खेलाडीहरु सबै हिसाबले सहि हुनुहोला । तर शंकै गर्न नपाइने भन्ने हुुँदैन । हामीले त्यहि गरेका हौं । यसमा क्लब बोल्नुपर्ने अर्थ छैन । सम्बन्धित विद्यालय, जिल्ला वा प्रदेश खेलकुदले बोल्नसक्छन् । गण्डकीलाई हराउँदै बागमती च्याम्पियन बनेको थियो ।