पोखरा (हाम्रो खेलकुद)– पोखरामा यहि साता ‘छैटौं दक्षिण एसियाली च्याम्पियनसिप’ तथा ‘आठौं राष्ट्रिय ट्रायथोलन’ प्रतियोगिता आयोजना हुने भएको छ । नेपाल ट्रायथोलन संघको आयोजना र कास्की जिल्ला ट्रायथोलन संघको व्यवस्थापनमा शनिबार हुने प्रतियोगिताको सबै तयारी पुरा भएको बताइएको छ  ।

कास्की जिल्ला ट्रायथोलन संघका अध्यक्ष सुमन देवकोटाले प्रतियोगितामा करिब १ सय खेलाडीको सहभागिता रहने पत्रकार सम्मेलनमा जानकारी दिए । प्रतियोगिताका सहभागीले ट्राइयाथनल अन्तरगतको स्प्रिन्ट विधामा फेवातालमा ७ सय ५० मिटरको पौडी पश्चात बाराही घाट देखि मुस्ताङ चोक सम्म चार ल्यापको २० कि.मि. साइक्लिङ, र ५ किलोमिटरको दौड पुरा गर्नुपर्नेछ ।

दुवाथलन का सहभागीले ५ कि.मि. दौड २० कि.मि. साइक्लिङ र २.५ कि.मि. दौड पुरा गर्नुपर्ने हुन्छ । पोखरामा आयोजना हुने प्रतियोगिता बाट भदौमा इण्डोनेशियाको जर्कातामा हुने १८ औं एसियाली खेलकुदका लागि समेत खेलाडी छनोट गरिने बताइएको छ । दक्षिण एसियामा उत्कृष्ट ट्रायथोलनका लागि पोखरा उत्कृष्ट स्थल भएको उल्लेख गर्दै अध्यक्ष देवकोटाले सहभागी मध्ये १५ जना महिला रहने बताए ।

स्थानिय महिला तथा पुरुष खेलाडीहरुको सहभागिता बढाउन प्रयास भइरहेको जानकारी दिदै अध्यक्ष देवकोटाले प्रतियोगिता खुल्ला भएकाले विदेशी खेलाडीको सहभागिता रहने जबताए । दक्षिण एसियाली तर्फ हाल सम्म भारत र बंगालादेशले नाम दर्ता गराइसकेको पाकिस्तान तथा श्रीलंकाले पनि सहभागिता जनाउने सम्भावना रहेको अध्यक्ष देवकोटाले जनाए ।

राष्ट्रिय गौरबको रुपमा रहेको ट्रायथोलन खेललाई विकास गर्ने प्रयास भइरहेकोले पोखरामा राष्ट्रिय ट्रायथोलन एकेडेमी स्थापना गर्न सोको अध्ययनका लागि राष्ट्रिय खेलकुद परिषदले २५ लाख छुट्टाएको बताए । उनले भने–‘पहिलो चरणको काम सुरु भएको छ यसमा सबैको सहयोग आवश्यक छ ।’

पोखरा लेखनाथ वडा नं २१ स्थित पुम्दी भुम्दीमा एकेडेमी स्थापनका लागि जग्गा खोजि भइरहेको जानकारी दिंदै अध्यक्ष देवकोटाले फेवातालको पानीको शुद्धता मापन गर्न प्रयोगशालामा पठाइएको बताए । पोखरालाई विश्वको उत्कृष्ट ट्रायथोलन गन्तव्यको रुपमा आवश्यक पूर्वाधार निर्माण र जग्गाका लागि प्रदेश र स्थानिय सरकारले पनि थप चासो दिनु पर्ने उनले बताए ।

पश्चिमाञ्चल क्षेत्रिय खेलकुद बिकास समितिका अध्यक्ष खगराज पौडेलले ट्रायथोलन खेल नेपालको सन्दर्भमा उत्कृष्ट र आशा लाग्दो खेल रहेको बताउँदै १३ औं दक्षिण एशियाली खेल (साग) मा नेपालले स्वर्ण पदक जित्ने सम्भावना रहेको बताए ।

उनले ट्रायथोलन खेल अन्य खेलको तुलनामा प्राथमिकतामा नै रहेको बताउँदै ट्रायथोलन खेललाई थप व्यवस्थित बनाउन सक्ने हो भने पोखरा खेलकुद गन्तव्य शहरको रुपमा बिकास हुने बताए । कास्की जिल्ला ट्रायथोलन संघका सचिब तथा कास्की जिल्ला खेलकुद बिकास समिती कार्यालय प्रमुख प्रकाश बरालले प्रतियोगिताका लागि झन्डै ८ लाख रुपैयाँ खर्च हुने बताए ।