काठमाडौं(हाम्रो खेलकुद)- विभागीय टोली त्रिभुवन आर्मी क्लब र सामाखुशी इंग्लिस बोर्डिङ स्कुल (सेव) ले शनिबारबाट शुरु भएको १४औं रेडबुल ढोरपाटन सुजुकी महिला डबल लिग भलिबल प्रतियोगितामा विजयी सुरुवात गरेका छन् ।

नयाँ बसपार्कस्थित ढोरपाटन क्लबको खेल मैदानमा शनिबार भएको उद्घाटन खेलमा आर्मीले श्री गाँउ खेलकुद विकास समिति दाङलाई ३–० को सोझो सेटमा पराजित गर्दै विजयी सुरुवात गरेको हो । आर्मीले दाङमाथि २५–१८, २५–८ र २५–१६ को सहज जित निकाल्यो ।

शनिबारै भएको अर्काे खेलमा सेवले थाहा नगरपालिका मकवानपुरलाई ३–० को सोझो सेटमा पराजित गर्दै विजयी शुरुवात ग¥यो । सेवले थाहा नगरपालिकामाथि २५–१७, २५–११ र २५–१५ को सहज जित निकाल्यो ।

अर्काे खेलमा थाहा नगरपालिका मकवानपुरले आयोजक ढोरपाटन क्लबलाई २५–१६, २५–१२ र २७–२५ को सोझो सेटमा पारजित गर्दै मिश्रित नतिजा निकाल्यो । मकवानपुर पहिलो खेलमा सेवसँग पराजित भएको थियो ।

डबल लिगको आधामा हुने प्रतियोगिता अन्तरगत आइतबार चार खेल हुने आयोजकले जनाएको छ । पहिलो खेलमा दाङ र मकवानपुर, दोस्रो खेलमा ढोरपाटन र सेव, तेस्रो खेलमा आर्मी र मकवानपुर तथा चौथो खेलमा दाङ र ढोरपाटनबीच खेल हुनेछ । प्रतियोगिता ५ माघबाट १९ माघसम्म चल्नेछ ।

एपिएफ क्लब, नेपाल पुलिस क्लब, पश्चिमाञ्चल क्षेत्रीय खेलकुद बिकास समिति पोखरा, त्रिभुवन आर्मी क्लब, चितवन टाइगर्स, श्री गाँउ खेलकुद बिकास समिति दाङ, सेव स्कुल, थाहा नगरपालिका मकवानपुर र आयोजक ढोरपाटनको सहभागिता रहनेछ । दोस्रो चरणमा ७ टोलीले स्थान बनाउनेछन् । यि टोलीहरुबाट धेरै अंक हात पार्ने टोली लिगको च्याम्पियन बन्नेछ ।

प्रतियोगिताको विजेताले ३ लाख ५० हजार पाउनेछ दोस्रो हुने टोलीले दुई लाख प्राप्त गर्ने छ । त्यस्तै तेस्रो हुनेले १ लाख, चौथो हुने टोलीले ६० हजार, पाँचौ हुनेले ४० हजार, छैठौं हुनेले ३० हजार र सातौं हुने टोलीले २० हजार नगद पुरस्कार प्राप्त गर्नेछन् ।

व्यक्तिगत विधातर्फ उत्कृष्ट खेलाडी, उदयमान खेलाडी, बर्ष खेलाडी, प्लेयर अफ दि सिरिज र एक जना भाग्यमानि दर्शकले १–१ थान सुजुकी स्कुटर पाउने छन् । त्यस्तै उत्कृष्ट स्पाइकर, उत्कृष्ट डिफेन्डर, उत्कृष्ट ब्लकर, उत्कृष्ट सर्भर, उत्कृष्ट सेटर र उत्कृष्ट प्रशिक्षकले समान ६–६ हजार नगत प्रप्त गर्ने आयोजकले जानकारी दिए । प्रतियोगितामा ५० लाख लाग्ने अनुमान गरिएको छ ।
प्रतियोगितालाई रेडबुलले मुख्य प्रायोजन तथा भिजी अटोमोवाइलको सुजुकीले गरेको छ ।