काठमाडौं (हाम्रो खेलकुद)– श्रीगाँउ खेलकुद विकास समितिले राजधानीमा जारी १४औं संस्करणको रेडबुल ढोरपाटन सुजुकी महिला डबल लिग भलिबल प्रतियोगितामा आइतबार दोहोरो जित निकालेको छ ।
नयाँ बसपार्कस्थित ढोरपाटन क्लबको खेल मैदानमा भएको खेलमा श्रीगाँउ दाङले थाहा नगरपालिका मकवानपुर र ढोरपाटन क्लबलाई पराजित गर्दै दोहोरो जित निकालेको हो । पहिलो दिन दाङ त्रिभुवन आर्मी क्लबसँग पराजित भएको थियो ।
पहिलो खेलमा दाङले थाहा नगरपालिकामाथि ३–० को सहज जित निकाल्यो । दाङले थाहा नगरपालिकामाथि २५–४, २५–९ र २५–९ को सहज जित निकाल्यो । दोस्रो खेलमा दाङले आयोजक ढोरपाटनमाथि २५–१०, २५–९ र २५–६ को सहज जित निकाल्यो । दोहोरो जितसँगै दाङले लिगमा ६ अंक जोडेको छ ।
आइतबारै भएको अर्को खेलमा आर्मीले थाहा नगरपालिकामाथि २५–७, २५–९ र २५–१२ को सहज जित निकाल्दै आफ्नो अपराजित यात्रालाई निरन्तरता दियो । आर्मीको दुई खेलबाट ६ अंक रहेको छ ।
सामाखुशी इंग्लिस बोर्डिङ स्कुल (सेव) ले आयोजक ढोरपटनलाई २५–१६, २५–२० र २५–२१ को जित निकाल्दै लगातार दोस्रो जित निकाल्न सफल भयो । अराजित रहेको सेवको पनि ६ अंक नै रहेको छ । ढोरपाटनले अंकको खाता खोल्न नसक्दा मकवानपुरले एक खेलमा जित निकाल्दै ३ अंक जोड्न सफल भएको छ ।
डबल लिगको आधामा हुने प्रतियोगिता अन्तरगत सोमबार चार खेल हुने आयोजकले जनाएको छ । पहिलो खेलमा दाङ र सेव, दोस्रो खेलमा आर्मी र ढोरपाटन, तेस्रो खेलमा एपीएफ र दाङ र चौथो खेलमा पुलिस र सेवबीच खेल हुनेछ । प्रतियोगिता ५ माघबाट १९ माघसम्म चल्नेछ ।
