काठमाडौं (हाम्रो खेलकुद)- राजधानीमा जारी १४औं रेडबुल ढोरपाटन सुजुकी महिला डबल लिग भलिबल प्रतियोगितामा विभागीय नेपाल पुलिस क्लबको अपराजित यात्रामा पुर्णविराम लागेको छ । साविकको विजेता नेपाल एपीएफ क्लबसँग ३–० को सोझो सेटमा पराजित भएपछि पुलिसको अपराजित यात्रामा पुर्णविराम लागेको हो ।

एपीएफसँगको हारसँगै पुलिस दोस्रो स्थानमा झरेको छ । समान २१ अंक भएपनि पुलिस हेड टु हेडमा एपीएफसँग पछि परेको हो । नयाँ बसपार्कस्थित ढोरपाटन क्लबको खेल मैदानमा सोमबार भएको खेलमा एपीएफले पहिलो सेट २५–२० ले सहजै आफ्नो पक्षमा पारेको थियो ।

तर, रोमाञ्चक र प्रतिस्पर्धात्मक बनेको दोस्रो सेटमा एपीएफले पुलिसलाई पराजित गर्न निकै संघर्ष गर्नुपर्दा ३३–३१ को कठिन जित निकाल्यो । तेस्रो सेट भने एपीएफले सहजै २५–१० ले आफ्नो पक्षमा पार्न सफल भयो । यससँगै पहिलो राउन्डको खेल सकिन लाग्दा एपीएफ लिगमा अपराजित रहने एक्लो टोली बनेको छ ।
सोमबारै भएको अर्काे खेलमा विभागीय त्रिभुवन आर्मी क्लबले पश्चिमाञ्चल क्षेत्रीय खेलकुद विकास समितिलाई ३–० को सोझो सेटमा पराजित गर्दै तेस्रो स्थान बलियो बनाएको छ । आर्मीले पश्चिमाञ्चलमाथि २५–१२, २५–१५ र २५–२१ को सहज जित निकाल्यो ।

आर्मीसँग पराजित भएको पश्चिमाञ्चलले चितवन टाइगर्समाथि २५–२२, २५–५ र २५–१५ को जित निकाल्दै चौथो स्थानमा उक्लन सफल भयो । पश्चिमाञ्चलले ७ खेलबाट १३ अंक जोड्यो ।
निकै रोमाञ्चक बनेको खेलमा चितवन टाइगर्सले श्रीगाँउ दाङमाथि ३–२ को रोमाञ्चक जित निकाल्यो ।

चिवनले सुरुवाती दुई सेट गुमाएर पनि उत्कृष्ट पुनरागमन गर्दै जित निकालेको हो । चितवन सुरुवाती दुई सेटमा १७–२५ र २१–२५ ले पछि परेको थियो । तर, त्यसपछिको तीन सेट चितवनले २५–२२, २५–५ र १७–१७ ले आफ्नो पक्षमा पार्न सफल भयो ।

प्रतियोगिता अन्तरगत मंगलबार पहिलो चरणको एक खेलसँगै पाँच खेल हुने आयोजकले जनाएको छ । पहिलो राउण्डको अन्तिम खेलमा एपीएफ र पश्चिमाञ्चलबीच प्रतिस्पर्धा हुनेछ । त्यसपछि आर्मी र सेव, पुलिस र चितवन टाइगर्स पश्चिमाञ्चल र श्रीगाँउ तथा एपीएफ र चितवन टाइगर्सबीच खेल हुनेछ ।

सेव ११ अंकसहित पाँचौ, श्रीगाँउ १० अंक जोडेर छैटौं स्थानमा रहेको छ । चितवन ८ अंक जोडेर सातौ थानमा रहँदै दोस्रो राउन्डमा प्रवेश गर्न सफल भयो । यि टोलीहरुबाट धेरै अंक हात पार्ने टोली लिगको च्याम्पियन बन्नेछ ।

प्रतियोगिताको विजेताले ३ लाख ५० हजार पाउनेछ दोस्रो हुने टोलीले दुई लाख प्राप्त गर्ने छ । त्यस्तै तेस्रो हुनेले १ लाख, चौथो हुने टोलीले ६० हजार, पाँचौ हुनेले ४० हजार, छैठौं हुनेले ३० हजार र सातौं हुने टोलीले २० हजार नगद पुरस्कार प्राप्त गर्नेछन् ।

व्यक्तिगत विधातर्फ उत्कृष्ट खेलाडी, उदयमान खेलाडी, बर्ष खेलाडी, प्लेयर अफ दि सिरिज र एक जना भाग्यमानि दर्शकले १–१ थान सुजुकी स्कुटर पाउनेछन् । त्यस्तै उत्कृष्ट स्पाइकर, उत्कृष्ट डिफेन्डर, उत्कृष्ट ब्लकर, उत्कृष्ट सर्भर, उत्कृष्ट सेटर र उत्कृष्ट प्रशिक्षकले समान ६–६ हजार नगत प्राप्त गर्नेछन् । प्रतियोगिता ५ माघबाट १९ माघसम्म चल्नेछ ।

अंक तालिका
१. एपीएफ (२१) ७ खेल
२. पुलिस (२१) ८ खेल
३. आर्मी (१८) ८ खेल
४. पश्चिमाञ्चल (१३) ७ खेल
५. सेव (११) ८ खेल
६.श्रीगाँउ (१०) ८ खेल
७. चितवन टाइगर्स (८) ८ खेल
८. थाहा (३) ८ खेल
९. ढोरपाटन (०) ८ खेल