काठमाडौं (हाम्रो खेलकुद)– रामेछापको मन्थलीमा मंगलबारबाट सुरु भएको सिभिल भलिबल च्याम्पियनसिपमा प्रदेश १ ले विजयी सुरुवात गरेको छ । मंगलबार भएको प्रतियोगिताको उद्घाटन खेलमा प्रदेश १ ले कर्णाली प्रदेशलाई २५–१८, २५–२१,२५–२२ ले पराजित ग¥यो । विजयी टोली समुहमा पहिलो भएको छ ।
रामेछाप जिल्ला खेलकुद विकास समितीको आयोजनामा सुरु भएको प्रतियोगिता शनबिार सम्म चल्नेछ । मन्थली नगरपालिका प्रतियोगिताको मुख्य प्रायोजक र मुख्य सहआयोजक रहेको छ । यसैगरी, रामेछाप नगरपालका,सुनापती गाउँपालिका, खाँडाँदेवी गाउँपालिका, लिखु तामाकोसी गाउँपालिका, उमाकुण्ड गाउँपालिका, गोकुलगंगा गाउँपालिका र दोरम्बा गाउपालिका सह–आयोजक रहेका छन् ।
७ लाख २५ हजार पुरस्कार राशी रहेको प्रतियोगितामा प्रदेशका ६ टोली, रामेछापका तीन सहित १२ टोलीको सहभागिता रहेको छ । रामेछापका नमुनादीप युवा क्लब, शान्तीदीप युवा क्लब र प्याराडाइज युवा क्लबको सहभागिता रहेको छ ।
प्राय सबै टोलीमा राष्ट्रिय स्तरमा परिचित खेलाडीहरु रहेका छन् । गत वर्ष सुदूरपश्चिमले उपाधि जितेको थियो भने शान्तिदीप युवा क्लब दोस्रो भएको थियो ।
