नुवाकोट (हाम्रो खेलकुद) – आयोजक दुप्चेश्वर गाउँपालिका समुन्द्रटारले दोस्रो दुप्चेश्वर खुल्ला पुरुष भलिबल प्रतियोगिताको उपाधि जितेको छ ।

कल्याण माध्यमिक विद्यालय समुन्द्रटारमा शनिबार भएको फाइनलमा आयोजक दुप्चेश्वरले सोसल सर्भिसलाई ३–० को सेटमा पराजित गर्दै उपाधि जितेको हो । एकपक्षीय बनेको खेलमा दुप्चेश्वरले पहिलो सेट २५–२२ ले जितेको थियो । दोस्रो र तेस्रो सेट क्रमशः २५–२३ र २५–१८ ले सहजै आफ्नो बनायो ।

उपाधिसँगै दुप्चेश्वरले १ लाख २५ हजार नगद पुरस्कार प्राप्त ग¥यो । उपविजेताले ७५ हजार रुपैया पायो । तेस्रो भएको कालिका युथ क्लबले ५० हजार र चौथो भएको पञ्चकन्याले २५ हजार पुरस्कार पाउनेछन् ।

विनोद चन्द प्रतियोगिताको सर्वाेत्कृष्ट खेलाडी घोषित भए । उनले ५ हजार रुपैया पाए । व्यक्तिगत विधातर्फ कुल बहादुर थापा स्पाइकर, सुरेन्द्र चौधरी सेटर, ध्रुव पौडेल ब्लकर, घनश्याम चौधरी सर्भर र भीम गाहामगर वेस्ट डिफेन्डर घोषित भए । उनीहरु सबैले ३–३ हजार पाए ।

यस्तै सोही अवसरमा महेन्द्र श्रेष्ठ, राजुकमार निरौला र टेक राज अवस्थीलाई विशेष सम्मान समेत गरेको थियो ।

दुप्चेश्वर गाउँपालिका र सोसियल सर्भिस युथ क्लबको संयुक्त आयोजना तथा कल्याण माध्यमिक विद्यालय दुप्चेश्वरको सहयोगमा होलीको अवसरमा ६ चैतबाट भएको दोस्रो संस्करणको प्रतियोगितामा ९ टोलीको सहभागिता रहेको थियो।