काठमाडौं (हाम्रो खेलकुद) – ह्वीलचेयर क्रिकेट संघ नेपालको आयोजनामा विश्वको पहिलो ह्वीलचेयर क्रिकेटको ‘एसिया कप’ टी–२० क्रिकेट प्रतियोगिता बैशाख तेस्रो साता नेपालमा आयोजना हुने भएको छ ।

सुशील कोइराला मेमोरियल फाउन्डेसनको सहकार्यमा पहिलो एसिया कप टी–२० क्रिकेट प्रतियोगिता वैशाख १८ देखि २१ गतेसम्म पुल्चोकस्थित पुल्चोक इन्जिनियरिङ कलेजको खेल मैदानमा सञ्चालन हुने संघका अध्यक्ष छुल्टिम ग्याल्जेन शेर्पाले पत्रकार सम्मेलनमार्फत जानकारी गराए ।

एसिया कपमा आयोजक नेपालसहित भारत, बंगलादेश र पाकिस्तानको सहभागिता रहनेछ । संघले गतवर्ष ह्वीलचेयर क्रिकेटको इतिहासमै पहिलोपल्ट नेपाल, भारत र बंगलादेशबीच त्रिकोणीय सिरिजको सफलतापुर्वक आयोजना गरेको थियो । जसमा नेपाल नै च्याम्पियन बनेको थियो । त्यसै आधारमा अन्तर्राष्ट्रिय ह्वीलचेयर क्रिकेट काउन्सिलले नेपाललाई एसिया कप आयोजनाको अधिकार प्रदान गरेको संघका अध्यक्ष शेर्पाले जानकारी गराए ।

संघका अध्यक्ष शेर्पाले नेपालमा अपाङ्गमैत्री कुरा हुने भएपनि व्यवहारमा नदेखाउने प्रवृत्ति रहेको औल्याउदै अपाङ्गलाई व्यवहार र प्राथमिकतामा नल्याएकोमा दुखेसो पोखे । उनले साना क्रिकेट प्रतियोगितालाई बढी प्राथमिकता दिँदा एसिया कप जस्तो प्रतियोगितालाई राखेपले त्रिवि क्रिकेट मैदान उपलब्ध नगराउँदा हामीलाई अपहेलना महसुस भएको बताए । त्यो समयमा प्रधानमन्त्री कप आयोजना हुदैछ ।

१७ सदस्यीय नेपाली टोलीले काठमाडौं क्रिकेट ट्रेनिङ सेन्टर (केसीटिसी) र जोरपाटीमा प्रशिक्षण गरिरहेको छ । करिव १ करोड खर्च हुने अनुमान गरिएको प्रतियोगिताको विजेताले १ लाख तथा दोस्रो हुनेले ५० हजार रुपैयाँ हात पार्नेछन् ।