काठमाडौं (हाम्रो खेलकुद) – नेपाल खेलकुद पत्रकार मञ्चले स्वर्गीय खेलपत्रकार सुमन भोम्जनको स्मृति दिवस मनाएको छ । काठमाडौंको त्रिपुरेश्रस्थित मञ्चको केन्दीय कार्यालयमा बिहीबार कार्यक्रम आयोजना गरी भोम्जनको स्मृति दिवस मनाएको हो ।

२०७२ बैशाख १२ गते आएको विनाशकारी भुकम्पमा परि भोम्जनको निधन भएको थियो । तर, उनको शव बैशाखको १९ गते मात्र फेला परेको थियो । मञ्चको मकवानपुर जिल्ला समन्वय शाखाका अध्यक्ष समेत रहेका भोम्जन गोरखापत्र राष्ट्रिय दैनिकमा खेलकुुद ब्युरोमा कार्यरत थिए ।

हेटौंडा स्थायी घर भएका भोम्जनको शव विनाशकारी भूकम्पमा महावौद्ध स्थित डेरामा बैशाख १९ गते भेटिएको थियो । सोही दिनलाई मञ्चले स्मृति दिवस मनाउँदै आएको छ ।
कार्यक्रममा बोल्दै मञ्च कार्यसमिति सदस्य तथा गोरखापत्रकर्मी प्रजित शाक्यले फुटबल र बक्सिङमा रुचि राख्ने ब्यक्तिको रुपमा भोम्जनको सम्झना गरेका थिए ।

शाक्यले भोम्जनको योगदानलाई मञ्चले रचनात्मक कार्यक्रमगरी सम्झिरहने बताए । नेपाली राष्ट्रिय टोलीका फुटबलर रञ्जन बिष्टले स्वर्गीय भोम्जन दाईका कारण आफू फुटबल खेलाडी भएको बताए । भोम्जनका आफन्त बिष्ट हेटौडाका बासिन्दा हुन् ।

मञ्चका प्रथम उपाध्यक्ष संजिव शिल्पकारले खेलकुद पत्रकारिता र मञ्चका हरेक गतिविधिमा सदा क्रियाशिल रहने आत्मिय मित्र भोम्जनलाई आफुहरुले गुमाउनु परेको बताएका थिए । एआईसिएस एसियाका कोषाध्यक्ष निरन्जन राजवंशीले भोम्जन नेपाली खेलकुदमा जुझारु युवा पत्रकार भएको स्मरण गरे ।

मञ्चका अध्यक्ष दूर्गानाथ सुवेदी (देवेन्द्र) ले भोम्जनको निधनले मञ्च र खेलकुद पत्रकारिता क्षेत्रमा ठुलो क्षति पुगेको बताए । पत्रकारिता क्षेत्रले एक उर्जावान खेल पत्रकार गुमाएको भन्दै उनले भोम्जनलाई खेलकुद क्षेत्रले सदा सम्झिरहने उल्लेख गरे । कार्यक्रममा मञ्चका सदस्यहरुले भोम्जनको तस्विरमा पुष्प गुच्छा अर्पण गरेका थिए ।