काठमाडौं (हाम्रो खेलकुद) – दक्षिण एसियाली खेलकुद (साग) को १३ औं संस्करण सन् २०१९ भित्र आयोजना गरिसक्ने राष्ट्रपति विद्यादेवी भण्डारीले बताएकी छिन् ।

संघिय संसदको संयुक्त बैठकमा आगामी आर्थिक वर्षको नीति तथा कार्यक्रम सार्वजनिक गर्ने क्रममा राष्ट्रपति भण्डारीले आवश्यक पूर्वाधार निर्माण गरि यो वर्ष साग आयोजना गर्ने घोषणा गरेकी हुन् । सागको आयोजक दक्षिण एसियाली ओलम्पिक काउन्सिलले यसअघि तेस्रो पटक मिति सार्दै डिसेम्बर १ देखि १० गते सम्म १३ औं साग आयोजनाको मिति घोषणा गरेको थियो ।

उनले काठमाडौंको मूलपानीमा निर्माणाधिन अन्तर्राष्ट्रिय क्रिकेट मैदान आउँदो २ वर्ष भित्र सञ्चालनमा ल्याईने बताइन् । दशक भन्दा लामो समयदेखि मैदान निर्माणको काम पुरा हुन सकेको छैन । निजी क्षेत्रको अग्रसरतामा बन्ने खेल मैदान निमार्णमा सरकारले प्रोत्साहन गर्ने पनि भण्डारीले उल्लेख गरिन् ।

क्रिकेटको विकासका लागि एकेडेमी स्थापना गर्ने सरकारको लक्ष्य रहेको जनाउँदै राष्ट्रपति भण्डारीले काठमाडौं उपत्यकामा अन्तर्राष्ट्रियस्तरको राष्ट्रिय खेलकुद परिसर निर्माण गर्न आगामी आर्थिक वर्षमा विस्तृत परियोजना प्रतिवेदन तयार गरिने बताइन् ।

सरकारले सबै प्रदेशमा सुविधासम्पन्न रगंशाला निर्माण गर्नुका साथै स्थानीय तहमा दीर्घकालीन महत्त्वका खेलग्रामको निर्माण, विकास र विस्तार गर्ने कार्यलाई तीब्रता दिने योजनालाई नीति तथा कार्यक्रममा समेटेको छ ।