काठमाडौं (हाम्रो खेलकुद) – सरकारले चालु आर्थिक वर्ष २०७६/७७ को लागि विनियोजन गरेको बजेटमा खेलकुद क्षेत्रको बजेट घट्ने भएको छ ।
अर्थमन्त्री युवराज खतिवडाले बुधबार सार्वजनिक गरेको बजेटमा यस चालु आर्थिक वर्षको लागि युवा तथा खेलकुदलाई ३ अर्ब ९९ करोडको बजेट विनियोजन गरेका हुन् । जुन गत आर्थिक वर्षभन्दा झन्डै १९ करोडले कम हो । अघिल्लो वर्ष सरकारले युवा तथा खेलकुद क्षेत्रमा ४ अर्ब १८ करोड ९५ लाख रुपैयाँ बजेट विनियोजन गरेको थियो ।
चालु आर्थिक वर्षको १५ खर्ब ३२ अर्ब ९६ करोड ७१ लाख बजेटमध्ये युवा तथा खेलकुदको बजेट समग्रमा ०.२६ प्रतिशत हो । यस चालु आर्थिक वर्षको बजेटमा क्रिकेट नै उच्च प्राथमिकतामा परेको छ । मुलपानी अन्तर्राष्ट्रिय क्रिकेट मैदानलाई दुई बर्षभित्र सञ्चालनमा ल्याउने लक्ष्यसहित १० करोड रुपैयाँ विनियोजन गरेको छ । निजी क्षेत्रबाट हुने क्रिकेट प्रतियोगितालाई प्रोत्साहन गरिने बजेटमा उल्लेख छ । यस्तै सरकारले पहिलो पटक क्रिकेट एकेडेमी बनाउन पनि बजेट छुट्याएको छ ।
आगामी आवमा सरकारले काठमाडौंमा अन्तर्राष्ट्रिय खेलकुद परिषद बनाउन बजेट छुट्याएको छ । यस्तै प्रत्येक प्रदेशमा रंगशाला निर्माण, सवै स्थानिय तहमा खेल ग्राम निर्माणका लागि पनि बजेट छुट्याएको छ । यस्तै बजेटमा एक विद्यालय एक खेलकुद शिक्षक नियुक्त गर्न ५ अर्ब रुपैयाँ छुट्याइएको छ ।
सरकारले आगामी मंसिरमा हुने दक्षिण एसियाली खेलुकद र नवौं राष्ट्रिय खेलकुद प्रतियोगिताका लागि पनि बजेट छुट्याएको छ । गत आर्थिक वर्ष युवा तथा खेलकुद मन्त्रालयका लागि छुट्याइएको बजेटमध्ये एसियाली खेलकुद, दक्षिण एसियाली खेलकुद र आठौं खेलकुद प्रतियोगिताका लागि २ अर्ब ४ करोड बजेट थियो ।
