नुवाकोट (हाम्रो खेलकुद)- होङ्ग्वान्जी न्यु डायमन्ड एकेडेमी र विभागीय टोली नेपाल एपीएफ क्लब नुवाकोटमा जारी प्रथम उपमेयर कप रााष्ट्रिय महिला भलिवल प्रतियोगिताको फाइनलमा भिड्ने भएका छन् ।

जिल्ला खेलकुद विकास समितिको मैदान कोलनीमा आइतबार भएको पहिलो सेमिफाइनलमा डायमन्डले आर्मीमाथि ३–० को सहज जित हात पार्दै उपाधिनजिक पुग्दा एपीएफले अर्काे विभागीय टोली नेपाल पुलिस क्लबलाई सोझो सेटमा पराजित गर्दै फाइनलमा भेट पक्का गरेको हो ।

एकपक्षीय खेलमा डायमन्डले आर्मीमाथि २५–१२, २५–१२ र २६–२४ को सहज जित निकाल्यो । डायमन्डको जितमा उच्च प्रदर्शन गरेकी प्रतिभा माली खेलको वुमन अफ दि म्याच घोषित भइन् । उनले १ हजार रुपैया पाइन् ।

अर्काे सेमिफाइनलमा एपीएफले पुलिसमाथि २५–१२, २५–१६ र २५–१५ को सहज जित निकाल्दै फाइनलमा थान बनायो । फाइनल सोमबार हुने आयोजक विदुर नगरपालिकाले जनाएको छ ।

जिल्ला खेलकुद विकास समितिको समन्वय तथा नुवाकोट भलिवल संघको सहयोगमा भएको प्रतियोगिताको विजेताले १ लाख ५० हजार रुपैयाँ हात पार्नेछन् ।

दोस्रो हुनेले ७५ हजार तथा तेस्रोले ४० हजार रुपैया हात पार्नेछन् । प्रतियोगिताको सर्वाेत्कृष्ट खेलाडीले ५ हजार र व्यक्तिगत विधाका स्पाइकर, सेटर, ब्लकर, लिवेरो र सर्भरले जनही ३ हजार पाउनेछन् ।