काठमाडौं (हाम्रो खेलकुद) – नेपाल भलिबल संघले आगमी असोजमा माल्दिभ्समा आयोजना हुने एसियन बिच भलिबल र नेपालमै आयोजना हुने १३औं दक्षिण एसियाली खेलकुद अन्तर्गतको बिच भलिबलका लागि प्रारम्भिक टोलीमा १२ खेलाडी छनोट गरेको छ ।
खेलाडी छनोट समितिका संयोजक याम बहादुर गुरुङले आसन्न दुई बिच भलिबल प्रतियोगिताको लागि महिला र पुरुषमा प्रारम्भिक टोलीमा समान ६–६ खेलाडी छनोट गरिएको हाम्रो खेलकुदलाई जानकारी गराए ।
गण्डकी प्रदेशको राजधानी पोखरामा असार दोस्रो साता सम्पन्न सातौ पुरुष तथा छैटौं महिला बिच भलिबल च्याम्पियनसिपबाट खेलाडी छनोट गरिएको हो । छनोटमा पुरुष र महिला दुवैतर्फ शीर्ष तीन स्थान हात पार्ने खेलाडीहरु रहेका छन् । राष्ट्रिय भलिबल टोलीमा नपरेका अधिकांश खेलाडी बिच भलिबल टोलीमा अटाएका छन् ।
पुरुषतर्फ मानबहादुर श्रेष्ठ, दिल सुनार, अनिल दर्लामी मगर, राजु विक, सन्जु विक्रम शाह र रमेश केसीले प्रारम्भिक टोलीमा स्थान बनाएका छन् । महिलामा विनिता बुढाथोकी, नेविका चौधरी, निता कुमारी शाह, कोपिला उप्रेती, पुष्पा चौधरी र मनिषा चौधरीले प्रारम्भिक टोलीमा स्थान बनाउन सफल भएका हुन् ।
बन्द प्रशिक्षण केही दिनमा हुने र बन्द प्रशिक्षणपछि महिला पुरुषमा अब समान ४–४ जनाले बिच भलिबलको टोलीमा स्थान बनाउने संयोजक गुरुङले जानकारी गराए ।
