काठमाडौं (हाम्रो खेलकुद)- दुई महिनापछि नेपालमै आयोजना हुने १३औं दक्षिण एसियाली खेलकुद (साग) का लागि कुस्तीबाट १० पुरुष र १० महिला गरी २० जना खेलाडी छनौट भएका छन् । मकवानपुरको हेटौंडास्थित जिल्ला खेलकुद विकास समितिको कभर्डहलमा जारी बन्द प्रशिक्षणमा सहभागि ४० खेलाडीमध्ये सागमा प्रतिस्पर्धा गर्न २० जना छनौट भएका हुन् ।

दोस्रो चरणमा २८ जना खेलाडी छानिएका थिए । तीमध्ये ८ जना बुधबारको अन्तिम छनौटबाट बाहिरिएका हुन् । पुरुषतर्फ ५७ देखि १ सय २५ केजी र महिलातर्फ ७६ देखि ५० केजीसम्मको समुहमा खेलाडी छनौट प्रतियोगिता गरिएको थियो । सागका लागि खेलाडीलाई बन्द प्रशिक्षणमा राखिने र भारत र इरानँग मैत्रीपूर्ण प्रतिस्पर्धा गराउने नेपाल कुस्ती संघले जनाएको छ ।

खेलाडीलाई यसबीचमा पनि क्लोज क्याम्पमै राखेर नियमित प्रशिक्षण गराइरहने संघले जनाएको छ । गत साउन १० गतेबाट हेटौंडमा बन्द प्रशिक्षणमा रहेका खेलाडीहरुमा दुई महिनाको बीचमा राम्रो सुधार भएका र स्वर्णपदक अपेक्षा गरिएको संघका अध्यक्ष राज मोहम्मद मिया अन्सारीले बताए ।

नेपालले चौथो सागदेखि पुरुषतर्फ कुस्ती खेलमा सहभागिता जनाइरहेको छ । १२औं सागबाट महिलातर्फ पनि कुस्ती खेलमा नेपालले सहभागिता जनाउँदै आएको छ । संघले सागमा कुस्तीतर्फको प्रतियोगिता जनकपुरमा गर्ने तयारी गरिरहेको छ ।