काठमाडौं (हाम्रो खेलकुद)– नेपाली जुनियर ब्याडमिन्टन टोलीले दक्षिण एसियाली यू २१ क्षेत्रिय ब्याडमिन्टन च्याम्पियनसिपमा मिक्स टिममा कास्य पदक जितेको छ । माल्दिभ्समा जारी च्याम्पियनसिपमा नेपाली टोली भारतसँग ३–२ ले पराजित हुँदै फाइनल पुग्नबाट बञ्चित भएको थियो ।
त्यसअघि बंगलादेश र माल्दिभ्सलाई समान ३–२ ले हराउँदै नेपाली टोली सेमिफाइनल पुगेको थियो । नेपाली टोलीमा प्रिन्स दाहाल, प्रफुल महर्जन, रुकेश मर्हजन, रसिला मर्हजन, जेसिका गुरुङ र सिमा राजवंशी छन् । टोलीको प्रशिक्षकमा किरण थापा र व्यवस्थापकमा नेपाल ब्याडमिन्टन संघका सचिव नविनविक्रम शाह छन् ।
