काठमाडौ (हाम्रो खेलकुद)– दक्षिण एसियाली खेलकुद (साग) को १३ औं सस्करण सुरु हुन ४ दिनमा मात्र बाँकी रहँदा राष्ट्रिय खेलकुद परिषद् (राखेप) का उपाध्यक्ष पिताम्बर तिम्सिना नेपाली टोलीका सेभ द मिसन तोकिएका छन् । नेपाल ओलम्पिक कमिटी (एनओसी) का आफ्ना उप महासचिव समेत रहेका तिम्सिनालाई बुधबारको बैठकमा उक्त जिम्मा दिएको हो ।

एनओसीका अध्इक्ष जीवनराम श्रेष्ठको अध्यक्षतामा बसेको बैठकले दुई जनालाई डिपुटी सेभ द मिसन तोकेको छ । राष्ट्रिय टिम तयारी समितिका संयोजक रहेका रिम रानाभाटलाई काठमाडौं र एनओसी उपाध्यक्ष तेजबहादुर गुरुङ पोखरा हेर्ने गरि डिपुटी सेभ द मिसन तोकेको हो ।

अघिल्लो महिना भएको सहभागी ७ राष्ट्रको सेभ द मिसनको गोष्ठीमा नेपालका तर्फका एनओसीका उपाध्यक्ष चतुरानन्द राजवैद्य र राष्ट्रिय टिम तयारी समितिका संयोजक रानाभाटले भाग लिएका थिए । नेपालले भाग लिने अन्तर्राष्ट्रिय प्रतियोगितामा समान्यता राखेप सदस्य सचिवलाई सेभ द मिसन तोक्ने प्रचलनबाट एनओसीले यसपटक फरक निर्णय गरेको छ ।

राखेप सदस्य सचिव १३ औं साग आयोजक समितिका सदस्य सचिव पनि भएकोले कार्यव्यस्तताका कारण अर्कै पदाधिकारीलाई सेभ द मिसनको जिम्मेवारी दिने संकेत गरेको थियो । नेपाली टोलीको सेभ द मिसन तोकिएपछि तिम्सिनाले खुसी व्यक्त गरे ।

‘मैले सन् १९९९ मा आठौं सागमा एथलेटिक्सतर्फ स्वयम सेवकका रुपमा काम गरेको थियो । त्यहाँबाट निरन्तर खेलकुदमा कुनै न कुनै भूमिका रहेर काम गर्ने अवसर पाएको थिए,’ तिम्सिनाले हाम्रो खेलकुदसँग भने, ‘मेरो निरन्तरता र खेलकुद प्रतिको लगावका कारण आज यो गरिमामय जिम्मेवारी पाएको छु । यसका लागि एनओसीलाई धन्यवाद दिन चाहन्छु । आफ्नो गम्भिरतापूर्वक जिम्मेवारी निर्वाह गर्नेछु । ‘

आइतबार राष्ट्रपति विद्यादेवी भण्डारीले दशरथ रंगशालामा १३ औं सागको उद्घाटन गर्ने कार्यक्रम तय भएको यसअघि नै राखेप सदस्य सचिव रमेशकुमार सिलवालले जानकारी दिएका छन् । ७ देशका ३ हजार बढी खेलाडीले २६ खेलका प्रतिस्पर्धा गर्नेछन् ।