काठमाडौं (हाम्रो खेलकुद)– अर्को साता औपचारिक रुपमा सुरु हुने १३ औं दक्षिण एसियाली खेलकुद (साग) का लागि भन्डै १९ हजार सुरक्षाकर्मी परिचालन हुने भएका छन् । सागको प्रचार समितिले बिहीबार आयोजना गरेको पत्रकार सम्मेलनमा प्रहरी महानिरिक्षक सर्वेन्द्र खनालले १८ हजार ९ सय ३३ सुरक्षकर्मी परिचालन हुने जानकारी दिएका छन् ।

सागको उद्घाटन र समापनका दिन भने सवारी साधान चलाउन जोर विजोर प्रावधान लागु गर्ने बताइएको छ । सागको उद्घाटन दशरथ रंगशालामा मंसिर १५ गते हुनेछ । त्यो दिन विजोर संख्याका सवारी साधान चलाउन पाइने छ । त्यस्तै समान मंसिर २४ गते दशरथ रंगशालामा नै हुनेछ । त्यस दिन जोर संख्याका सवारी साधान प्रायोग गर्न पाइने बताइएको छ ।

त्यस्तै सवारी साधानका लागि सिमित ठाँउमा वान वे गरिएको छ । थापाथलीबाट कालिमाटी आउन जाने व्यवस्था गरिएको छ । तर थापाथलीबाट त्रिपुरेश्वर हुँदै सहिदगेट जान भने रोक लगाइने जनाइएको छ । सागमा प्रयोग हुने सवारी साधानको पार्किङका लागि भने टुडिखेलमा व्यवस्था गरिएको बताइएको छ ।

प्रतियोगिताको औपचारिक उद्घाटन आइतबार भएपनि सागका भलिबल खेल भने बुधबारबाट सुरु भइसकेका छन् । सागमा नेपालसहित ७ राष्ट्रका ३ हजार बढीले २६ खेलमा प्रतिस्पर्धा गर्नेछन् । सागमा समान ३ सय १७ स्वर्ण र रजत तथा ४ सय ८१ रजत पदकका लागि प्रतिस्पर्धा हुनेछ ।