काठमाडौं (हाम्रो खेलकुद)- सुनिरा थापा र रितिक राणा चौथो वीर गणेशमान सिंह राष्ट्रिय टेनिस प्रतियोगिताको सिंगल्समा च्याम्पियन भएका छन् ।

गणेशमान सिंह फाउन्डेसनको आयोजनामा शनिवार सम्पन्न प्रतियोगितामा सुनिरा वमन्स सिंगल्स र रितिक मेन्स सिंगल्समा च्याम्पियन भएका हुन् । सिंगल्स च्याम्पियनद्वय रितिक र सुनिराले समान १ लाख रुपैयाँ नगद पुरस्कार पाए ।

सातदोबाटोस्थित नेपाल टेनिस संघको कोर्टमा फाइनलमा सुनिराले अभिलाशा विष्टमाथि ६–४ र ७–५ ले हराइन् ।

रितिकले राजवीर प्रधानलाई ६–१ र ६–३ ले हराए । सिंगल्समा दोस्रो भएका खेलाडीले समान ५० हजार रुपैयाँ पुरस्कार प्राप्त गरे ।

मेन्स सिंगल्समा प्रणव मानन्धर र आयुषमान हजुर घले संयुक्त रूपमा तेस्रो भए । वमन्स सिंगल्समा प्राज्ना मानन्धर र स्वस्तिका विष्ट तेस्रो भए । तेस्रो हुनेले १२ हजार ५ सय रुपैयाँ प्राप्त गरे।

मेन्स ४५ वर्षमाथि सिंगल्समा कमलबहादुर भण्डारी च्याम्पियन भए । कमलले फाइनलमा छेवाङ लामालाई ६–१ र ६–२ ले हराए ।

कमलले ३७ हजार ५ सय र छेवाङले १८ हजार ७ सय ५० रुपैयाँ प्राप्त गरे । यसै उमेर समूहमा सुकमान तामाङ र महेश श्रेष्ठ तेस्रो स्थानमा रहे । दुवैले ३ हजार १ सय २५ रुपैयाँ प्राप्त गरे ।

पुरुष डबल्समा आयुष्मान घले र प्रदीप खड्काको जोडी च्याम्पियन बन्यो। वमन्स डबल्समा खेलाडी संख्या नपुगेपछि प्रतिस्पर्धा रद्द गरिएको थियो ।

नेपाल टेनिस संघको प्राविधिक सहयोगमा भएको प्रतियोगिताको सिनियर, भेट्रान र जुनियरमा गरी जम्मा २२ स्पर्धामा प्रतिस्पर्धा भएको थियो ।

मेन्स ३५ वर्षमाथि सिंगल्समा सन्तोष खत्री र डबल्समा सन्तोष खत्री र सुवास बस्नेतको जोडी, ५५ वर्षमाथि सिंगल्समा कमल थापा र डबल्समा उत्तम शेर्पा र चन्द्र शाहीको जोडी, ६५ वर्षमाथि सिगंल्समा कमल थापा र डबल्समा विदुर बिष्ट र भिक्टोर राणाको जोडीले विजयी भएको थियो।

जुनियरतर्फ बोइज र गल्र्समा यु–८, यु–९, यु–१०, यु–१२, यु–१४ सिंगल्स र खुला डबल्स विधामा प्रतिस्पर्धा भयो ।

विजेतालाई उपप्रधान तथा शहरी विकासमन्त्री प्रकाशमान सिंह, गणेशमान सिंह फाउन्डेसनका सदस्य तथा प्रतियोगिताका संयोजक भाष्करमान सिंह र नेपाल टेनिस संघकी अध्यक्ष ज्योति राणाले लगायतले पुरस्कृत गरे ।