सुमन अधिकारी, बुटवल

बुटवलमा तेस्रो मेयर कप तथा सातौ बुटवल खुल्ला लन टेनिस प्रतियोगिता सोमवार सुरु हुने भएको छ।

बुटवल उपमहानगरपालिकाको सहयोगमा रुपन्देही टेनिस संघको आयोजनामा फागुन ९ गतेसम्म हुने प्रतियोगितामा नेपालका महिला / पुरुष शीर्ष वरियताका १ सय सहभागिता रहने बताइएको छ ।

प्रतियोगिताको तयारी अन्तिम चरणमा पुगेको खेल संयोजक विष्णु प्रसाद चापागाईले बताए । प्रतियोगितामा पुरुष/महिला एकल, पुरुष ३५ , ४५ , ५५ , ६५ वर्ष माथि गरि ६ विधा तथा महिला/पुरुष डबल्स, पुरुष ३५ , ४५ र ५५ माथिको उमेर समूहमा गरि कुल ११ विधाका प्रतिस्पर्धा हुनेछ।

एकल महिला/ पुरुषको विजेताले समान ६० हजार, दोस्रोले ३० हजार र तेस्रो हुने खेलाडीले २० हजार‌ रुपैयाँ प्राप्त गर्नेछन्।

त्यस्तै पुरुष ३५ माथिकाले विजेताले ४० र दोस्रोले २०हजार, ४५ माथिको विजेताले ३५ हजार र दोस्रो २० हजार रुपैयाँ पाउनेछन्।

५५ माथिका विजेताले २५ हजार र दोस्रोले १५ हजार र ६५ माथिका १५ हजार र ७ हजार ५ सय रुपैयाँ प्राप्त गर्नेछन्।

महिला/ पुरुष डबल्स, पुरुष डबल्सका विजेताले पनि पुरस्कृत गरिने संघका अध्यक्ष गोपाल ज्ञवालीले बताए ।
लन टेनिस खेल र खेलाडी विकास गर्ने उद्देश्यका साथ संघबाट निरन्तर खेल गतिविधि हुँदै आएको संघका अध्यक्ष ज्ञवालीले बताए ।

प्रतियोगिता आयोजना गर्न करिब १७ लाख रुपैयाँ खर्च हुने अनुमान गरिएको छ। पुरुष एकलतर्फ नेपालका नम्बर एक खेलाडी प्रदिप खड्का साविक विजेता हुन् ।