सुमन अधिकारी, बुटवल

शीर्ष वरियताका प्रदीप खड्काले तेस्रो मेयर कप तथा सातौं बुटवल खुल्ला लन टेनिस प्रतियोगिताको उपाधिमा ह्याट्रिक गरेका छन् ।

प्रदीप बुटवल खुल्ला लन टेनिसमा पहिलोदेखि तेस्रो संस्करणमा लगातार च्याम्पियन बन्दै ह्याट्रिक गरेका हुन् ।

शुक्रवार भएको फाइनलमा रितिक रानालाई २-१ ले हराउँदै प्रदीपले उपाधि जितेका हुन् । उपाधि रक्षा गर्ने क्रममा प्रदीपले दोस्रो वरियताका रितिकलाई ३-६, ७-६ र ६-१ को सेटमा पराजित गरेका थिए ।

पहिलो सेट गुमाएका प्रदीपले करिव १ घण्टा चलेको दोस्रोमा जित निकाल्दै पुनरागमन गरे। तेस्रो सेटमा सजग जित निकाल्दै उनले उपाधि उचाले।

प्रदीपको यो सिजनको यो पहिलो उपाधि हो । उनले हालसम्म १५ पटक विभिन्न प्रतियोगितामा उपाधि जितेका छन् । बुटवल खुल्ला लन टेनिस प्रतियोगितामा भने यो उनको चौथो उपाधि हो । रितिकले २ र प्रनव मानन्धरले १ पटक उपाधि जितेका छन् ।

जितपछि प्रदीपले केहि गल्तीका कारण पहिलो सेट गुमाउन पुगेको जनाउँदै रितिकले आफ्नो प्रर्दशनमा सुधार गरेको बताए ।

रुपन्देही जिल्ला लन टेनसि संघद्वारा आयोजित प्रतियोगितामा उमन्स सिंगलको उपाधि यसअघि नै सुनिरा थापाले जितेकी थिइन् । अभिलाषा विष्टलाई पराजित गर्दै सुनिरा च्याम्पियन बनेकी हुन् । उमन्स /मेन्स दुवैतर्फका विजेताले ६० हजार र दोस्रो हुने
ले ३० हजार रुपैयाँसहित कप प्राप्त गरे ।

बुटवल उपमहानगरपालिका प्रमुख खेलराज पाण्डे, नेपाल टेनिस संघका केन्द्रीय सदस्य अशोक गुरुङ, बागमती टेनिस संघका अध्यक्ष मनोज राणा, नेपाली सेना पश्चिमपृतनका महासेनानी मछिन्द्र थापा, टेनिस संघका प्रदेश अध्यक्ष संजय श्रेष्ठ लगायतले विजेता खेलाडीलाई पुरस्कृत गरे।

प्रतियोगितामा उमन्स/ मेन्स सिंगल, मेन्स ३५ प्लस, ४५ प्लस, ५५ प्लस, ६५ प्लस गरि ६ र डबल्सतर्फ उमेन्स/मेन्स डबल्स, मेन्स डबल्स ३५ प्लस, ४५ प्लस र ५५ प्लस गरि ५ गरि कुल ११ विधाका लागि करिब १ सय खेलाडी सहभागिता थियो।