काठमाडौं, भदौ ४ गते |
अखिल नेपाल लनटेनिस संघको शुक्रबार सम्पन्न साधारणसभाले ज्योति राणाको अध्यक्षतामा १३ सदस्यीय केन्द्रीय कार्यसमिति निर्विरोध चयन गरेको छ । राणा अघिल्लो कार्यसमितिमा उपाध्यक्ष थिइन् ।
नवनिर्वाचित लनटेनिस अध्यक्ष ज्योति राणा |
अशोक गुरुङ, दीपेन्द्र चन्द ठकुरी, पुरुषोत्तम कोइराला, रोशन केसी, दीपक कार्की, जयजिभ हाडा र दावा सोनाम शेर्पा सदस्यमा चयन भए । मनोनित कोटाबाट ३ उपाध्यक्ष र ७ सदस्य आउन बाँकी छ ।
साधारणसभाको राष्ट्रिय खेलकुद परिषद्का उपाध्यक्ष लामा टेन्डी शेर्पाले एक कार्यक्रमबीच उद्घाटन गरे । साधारणसभामा विभिन्न १४ जिल्लाका २७ र केन्द्रबाट १३ गरी जम्मा ४० प्रतिनिधिको उपस्थिति रहेको संघ संस्था समन्वय शाखाका नायब सुब्बा राजेश श्रेष्ठले जनाएका छन् ।
नवनिर्वाचित पदाधिकारीहरुलाई प्रमुख निर्वाचन अधिकृत एवं संघ संस्था समन्वय शाखाका प्रमुख टेकप्रसाद कट्टेलले शपथ ग्रहण गराउनुका साथै प्रमाण पत्र प्रदान गरेका थिए ।
नवनिर्वाचित लनटेनिस पदाधिकारी सामूहिक तस्वीर खिचाउद |
नवनिर्वाचित अध्यक्ष राणाले बोलेर भन्दा पनि काम गरेर देखाउने परिपाटीमा जोड दिनु पर्ने बताउदै म होइन हामी भन्ने भावनालाई आत्मासात गर्दै ‘टिम वर्क’ का आधारमा काम गर्ने प्रतिबद्धता व्यक्त गरिन् ।
