एजेन्सी – दोस्रो वरीयताका स्पेनिस राफयल नाडाल र तेस्रो वरियाताका स्वीस रोजर फेडेरर अस्ट्रेलियन ओपन टेनिस प्रतियोगिताको प्रि–क्वाटरफाइनलमा प्रवेश गरेका छन् ।

रोड लभर एरेनामा शुक्रबार भएको खेलमा स्पेनका ३२ वर्षे नाडालले अस्ट्रेलियाका एलेक्स डि मिनाउरलाई ३–० को सोझो सेटमा पराजि गर्दै अन्तिम १६ मा स्थान सुरक्षित गरेका हुन् । नाडालले एलेक्स डिमाथि ६–१, ६–२, ६–४ सहज जित निकल्यो । अब नाडालले क्वाटरफाइनल प्रवेशका लागि चेक गणतन्त्रका टोमास बार्डेचसँग खेल्नेछ । बार्डेचले अर्जेन्टिनाका डिएको स्चवार्टम्यानलाई ५–७, ६–३, ७–५, ६–४ को सेटमा हराएका थिए ।

शुक्रबारै भएको अर्काे खेलमा स्वीट्जरल्यान्डका फेडेररले अमेरिकाका टेलर फ्रिट्जलाई ३–० को सोझो सेटमा पराजित गरे । फेडेररले अब क्वाटरफाइनल प्रवेशका लागि ग्रीसका स्टेफानोस सिटसीपससँग प्रतिस्पर्धा गर्नेछन् । सिटसीपसले जर्जियाका निकोलोजलाई ६–३, ३–६, ७–६ र ६–४ को सेटमा हराएका थिए ।

महिलातर्फ दोस्रो वरियाताकी एन्जेलिक केरबेरले अस्ट्रेलियाकी किम्बर्ले बिरेलमाथि ६–१, ६–० को सहज नतिजा निकाल्दै अन्तिम १६ मा स्थान बनाइन् । रसिययन टेनिस सुन्दरी मारिया सारापोभाले तेस्रो वरीयताकी कारोलिन वाज्नियाकीलाई ६–४, ४–६, ६–३ को सेटमा पराजित गर्दै अन्तिम १६ मा स्थान बनाइन् ।